Boks millimiz Mərakeşdə keçirilən Qızıl kəmər seriyasını 5 medalla başa vurub.

34 ölkədən 201 boksçunun qatıldığı ilin ilk turnirində qazanc 2 “qızıl”, 1 “gümüş”, 2 “bürünc” olub. Ümid Rüstəmov (57 kq) finalda rusiyalı Eduard Savvinlə qarşılaşıb. Hər 3 raundda inamlı mübarizə aparan milli üzvü 5:0 (29:28, 30:27, 29:28, 30:27, 29:28) hesabı ilə qələbə qazanaraq çempion olub. Onun uğurunu Nəbi İsgəndərov (67 kq) da təkrarlayıb. Gəncə boks məktəbinin yetirməsi finalda Tarxan İdiqova (Rusiya) gücünü göstərib - 4:1 (29:28, 29:28, 28:29, 30:27, 30:27). Alfonso Dominges (86 kq) gümüş medalla kifayətlənib. O da finalda rusiyalı boksçu ilə döyüşüb. Lakin görüşdə Şarabutdin Atayev qalib gəldiyindən, dünya çempionu fəxri kürsünün 2-ci pilləsinə qalxıb. Yarımfinalda mübarizəni dayandıran Məsud Yusifzadə (51 kq) ilə Sərxan Əliyev (71 kq) isə bürünc medalla kifayətlənib. Yarışın qalibi hesabına 900, gümüş medalçı 700, üçüncü isə 500 reytinq xalı əlavə edib. Pedro Rokenin rəhbərlik etdiyi millimiz bu nəticələrlə komanda hesabında ikinci yeri tutub. Rusiya (9 qızıl, 2 gümüş) birinci olubsa, “üçlüy”ü İtaliya (1 qızıl, 1 gümüş, 1 bürünc) qapayıb.