Ölkəmizdə ənənəvi idman növlərindən biri də boksdu. Abşeron rayonu, Ceyranbatan qəsəbəsinin gəncləri də “yumruq davası”na ciddi maraq göstərir. Onlara boksun sirlərini isə Rəşad Qocayev öyrədir.

"Footbal-plus.az" olaraq 5 illik məşqçi təcrübəsinə malik olan mütəxəssislə söhbətdə əvvəlcə problemlərə toxunduq:

“Koronavirus pandemiyası bütün sahələrdə olduğu kimi, boksda da zərərli nəticələrə səbəb oldu. İdman zallarının qapadılması, bir çox gəncin koronavirusla mübarizə aparması halları bu sahəni çox geri atsa da, gənclərimizin idman həvəsini birə-beş artırdı. İndi idmançılarımız arasında rəqabət daha güclüdü.

Boks ağırlığı ilə seçilir, idmançıdan daim hazırlıqlı olmağı tələb edir. Ümumiyyətlə, peşəkar boksçular həftənin bir günü istisna olmaqla hər gün məşq etsələr, daha yaxşıdı. Azyaşlılar isə həftədə 3 gün hazırlıq keçməlidi. İdmançının yüksək inkişaf səviyyəyə çatması üçün, sadəcə, həvəs və mənəvi dəstək kifayət etmir. Ona görə də hazırlıq zamanı zalda elə bir ab-hava yaradılmalıdı ki, idmançı özünü döyüşdə hiss etsin. Vacib avadanlıqlarımız var. Çatışmayan rinqdi. Bəllidi ki, rinq boksun sütunudu və boksçunu gerçəklərlə üzləşdirir. O da olsaydı, Ceyranbatanın yetirmələri hazırlıq mərhələsində daha böyük uğurların təməlini qoyardılar”.

Qocayevin fikrincə, boks daha ciddi diqqətə layiq idman növüdü:

“Təəssüf ki, respublika daxilində keçirilən yarışların sayı çox azdı. Fərqli tədbirlər sayəsində bu çatışmazlığı aradan qaldırmaq olar. Boksu diri saxlayan rəqabətdi. Rəqabət olmayan yerdə inkişafdan və beynəlxalq uğurlardan danışmaq mümkün deyil. Boks cəld hərəkət, dəqiq zərbə tələb edir. Tapşırıqların öhdəsindən gəlmək üçün isə fəal hazırlıq lazımdı. Ardıcıl turnirlərin, dostluq yarışlarının təşkili vacibdi. Bu baş verərsə, idmançıların məsuliyyətinə, performansına və gələcək uğurlarına böyük təkan olar.

Onu da əlavə edim ki, burda idman mediasının da üzərinə böyük vəzifə düşür. Telekanallarda, saytlarda və qəzetlərdə boksun təbliği bizə böyük motivasiya verir. Cəmiyyətin bu yöndə düzgün maarifləndirilməsi də vacibdi. Hələ də boksun ağırlığına görə övladını bu idman növündən yayındıran valideynlərə rast gəlirəm. Onlara deyirəm ki, boks böyüdüləcək qədər zərərli deyil. Biz həm məşqlərdə, həm də rəsmi yarış və turnirlərdə bütün təhlükəsizlik tədbirlərinə riayət edirik. Yaradılan rahat şəraitlə də hər kəsi tanış edirəm. Yaşından asılı olmayaraq, heç bir idmançı müəyyən hazırlıq mərhələlərindən keçmədən peşəkar idmançılarla mübarizəyə cəlb olunmur.

Ümumiyyətlə, boksun başqa idman növlərinin kölgəsində qalmasına razı ola bilmərik”.

Rəşad bəy Ceyranbatan boksunun Azərbaycan idmanına töhfələrini də diqqətə çatdırdı:

“Həvəskar gənclərimizin çalışqanlığı, məsuliiyətli yanaşma və rəqabət prinsipləri məni qürurlandırır. Tələbələrimdən Hüseyn Hacıyevlə (63 kq) Həsən Hacıyev (60 kq) yeniyetmələr arasında Azərbaycan birinciliyində ikinci olub. Qiyas Mehdiyev “Təhsil” İdman Cəmiyyətinin Respublika birinciliyində qalib gəlib. İki ilini pandemiya ilə mübarizəyə qurban verdiyim 5 illik məşqçi karyeramın bu uğurlarla yadda qalması mənim üçün çox dəyərlidi.

Ceyranbatanda sadaladığım və daha böyük uğurlar qazanacaq idmançılar çoxdu. Burdakı həmkarlarımın yetirmələri də böyük uğurlara imza atıb. Qəsəbəmiz Azərbaycan bayrağını başqa ölkələrdə dalğalandıran bokçular yetişdirib. Gənclərimiz də həmin idmançılardan nümunə götürür. Əlbəttə, 5 il ölkə və beynəlxalq arena üçün az vaxtdı. Qazandığımız uğurlar bu işin öhdəsindən gələ biləcəyimizin bariz nümunəsidi. Ceyranbatan da daxil olmaqla ölkəmizin hər bölgəsində saysız-hesabsız boksçuların yetişdiyinə əminəm. Bizim vəzifəmiz isə onlara dəstək olmaq, doğru istiqamətə yönəltməkdən ibarətdi. Məşqlərimiz fasiləsiz davam edir. Boks elə sahədi ki, çox dincəlmək idmançını yorur. Biz də buna yol verməmək üçün çalışırıq.

Ceyranbatan idmançıları həqiqətən peşəkar olmaq yolunda inamla addımlayır. Əsas məqsədimiz beynəlxalq arenalarda mübarizə aparmaq və bayrağımızı dalğalandırmaqdı. Bu yolda bütün həmkarlarıma və idmançılara uğurlar arzulayıram”.

Həmsöhbətimiz sonda Ceyranbatan boksunun inkişafına maddi və mənəvi cəhətdən dəstək olanlara da təşəkkür etdi:

"Dəfələrlə respublika çempionu, Avropa ikincisi olan, hələ də ürəyi boksla döyünən Rauf İsayev ilk günlərdən köməyini bizdən əsirgəməyib. Sözün əsl mənasında boksa sahib çıxır, Ceyranbatanda yaşayan idmançıların məşq prosesi və yarışlara qatılması üçün lazım olan vəsaiti ayırır. Rauf bəyin adını çəkmək mənəvi borcumdu".

KƏNAN BAHADIR