MBA-da son üç gündə keçirilən oyunlarla bağlı ən müxtəlif statistik məqamları, seriyaları vurğulamaq olar.

Məsələn, evdə “Filadelfiya 76”ya uduzan “San-Antonio” ardıcıl 8-ci məğlubiyyətlə barışdı. Ancaq indi MBA-da hər kəs belə statistik məqamlara yox, tarixi hadisəyə köklənib. “Leykers”in forvardı Lebron Ceyms srağagün komandasının “Nyu-Orlean”a uduzduğu oyunda 27 xal topladı. İndi 38 yaşlı amerikalının hesabında 38352 xal var. O, Kərim Əbdül-Cabbarın illərdi yaşayan rekordunu (38387) qırmaq və MBA tarixinin bombardiri olmaq üçün daha 36 xal toplamalıdı. Bu tarixi hadisə, çox güman, sabah gerçəkləşəcək. Məhz fevralın 8-i, Bakı vaxtı ilə səhər saat 7-də başlayacaq oyunda “Leykers” “Oklahoma-Siti”ni qəbul edəcək. Əvvəlki sayımızda bu oyunun bilet qiymətinin 92 min dollara yüksəldiyini xəbər vermişdik. “Bleacher Report” son xəbərində artıq biletlərin 100 min dollara satıldığını xəbər verir. Bir sözlə, bütün basketbol dünyası bu möhtəşəm hadisəyə şahidlik etmək istəyir.