“Atletik”in hücumçusu İnyaki Uilyamsın “Futbol+” səhifələrində də dəfələrlə xatırlatdığımız möhtəşəm seriyası, nəhayət, bitdi – o, 2016-nın aprelindən bəri ilk dəfə La Liqa oyununda meydana çıxa bilmədi. “Atletik” isə “Selta”ya 0:1 hesabıyla uduzdu. Qana pasportu daşıyan bask 6 il 9 ay 22 gün davam gətirdi…

Football-plus.az xəbər verir ki, yanvarın 26-da İspaniya kubokunun 1/4 finalı çərçivəsində keçirilən “Valensiya” ilə oyunda (3:1) İnyaki 88 dəqiqə meydanda oldu, iki məhsuldar ötürmə verdi və komandasının yarımfinala adlamasına yardım etdi. Ancaq oyundan sonra hücumçu gözlənilmədən əzələsində narahatlıq hiss etdiyini bildirdi. Onun adını “Selta” ilə çempionat oyununun iştirak ərizəsinə salsalar da, son anda çıxardılar, hətta ehtiyat oyunçular skamyasında da əyləşmədi. Bir müddət əvvəl də az qala Uilyamsın seriyası qırılacaqdı. Ötən ilin sentyabrında sağ diz bağlarını dartan hücumçi bir həftə sonra bərpa olundu. Ondan bir ay sonra isə ardıcıl 246-cı dəfə meydana çıxmaqla müdafiəçi Manfred Bintsin rekordunu təkrarladı. Ardından Uilyams bir neçə dəfə xəstəlik üzündən oyunu buraxmaq təhlükəsi ilə üzləşdi, ancaq hər dəfə də özündə güc tapıb rekordunu yeniləmək yolunda növbəti addımı atdı.

Ardıcıl 251 oyuna çıxmaq La Liqanın rekordudu. İnyaki sonuncu dəfə 2016-cı il aprelin 7-də meydana çıxmamışdı. Onda “Atletik” 2015/16 mövsümünün 33-cü turu çərçivəsində səfərdə “Malaqa” ilə qarşılaşırdı. Həmin vaxtda bəri bir oyun da buraxmamışdı.

• 2015/16 mövsümü – 5 oyun;
• 2016/17 mövsümü – 38 oyun;
• 2017/18 mövsümü – 38 oyun;
• 2018/19 mövsümü – 38 oyun;
• 2019/20 mövsümü – 38 oyun;
• 2020/21 mövsümü – 38 oyun;
• 2021/22 mövsümü – 38 oyun;
• 2022/23 mövsümü – 18 oyun.

La Liqada ardıcıl 202 oyuna çıxan Xuan Antonio Larranyaqenin həmkarının rekorduna münasibəti: “İnyakinin tarixçəsi ilə bağlı ən qeyri-adi məqam onun hücumçu olmasıdı. Belə uzun seriya yaxalamaq baxımından mürəkkəb mövqedi. Forvardlar oyunboyu təzyiqə məruz qalır. Onlar oyunları sıralamaq üçün çox hazırlıqlı olmalıdılar. Mən özüm də hər oyunda əziyyət çəkirdim. Heç də həmişə potensialımı tam göstərə bilmirdim. Dəfələrlə ağrı içində oynamışam. Və nəticəsi bu olub ki, ayaqda baş barmağın travmatik artritini qazanmışam”.

Maraqlıdı ki, İnyaki daim əsas heyətdə oynayıb. Altı tam mövsümün yalnız birində (2020/21 mövsümündə 28 dəfə) start heyətində 30 dəfədən az görünüb. Bu mənada ən yaxşı nəticəsi 2018/19 mövsümünə aiddi – 36 oyunda start heyətinə düşüb. Cari mövsümdə də “Selta” ilə oyuna qədər ilk “11-liy”in vazkeçilməz ismi idi. İnyaki 251 oyunluq seriya müddətində 50 qol və 51 məhsuldar ötürmə ilə yadda qalıb.

Bu müddətdə “Atletik” 5 dəfə baş məşqçini və hətta prezidenti dəyişib. Futbolçunun həyatında da önəmli hadisələr baş verib: Qana vətəndaşlığı alıb, Qətərdə keçirilən dünya çempionatında oynayıb, İnyakinin qardaşı Niko “Atletik”də debüt edib və möhkəmlənib.

Başqa liqalarda vəziyyət necədi?

Bəs başqa aparıcı liqalarda ardıcıl oyun sayı baxımından vəziyyət necədi? Daha böyük rekordlar var, ancaq hər yerdə qapıçılar liderlik edir. A seriyasının rekordçusu 258 oyunla “Roma”nın qabiq qapıçısı Franko Tankredidi. Fransada birincilik bütün karyerasını “Oser”də keçirən qapıçı Fabyen Kula (307) məxsusdu. Premyer-liqanın rekordçusu da qapıçısı – Bred Fridel, 310 oyun. Amma bunların hər biri “Bavariya”nın əfsanəvi qapıçısı Zepp Mayerə böyük fərqlə uduzur – ardıcıl 442 oyun, 13 mövsüm.

Uilyams ötən ilin dekabrında etiraf etmişdi ki, Mayerin rekordu haqda düşünmür, sadəcə, komandasına maksimum fayda vermək istəyir: “Hücumçu qol vurmalıdı. Hər oyundan ləzzət almağa və qapının bir neçə metrliyində sakitliyi qorumağa çalışıram”.