“Neftçi” anlaşılmazlığa aydınlıq gətirdi
Premyer-liqanın 19-cu turunun “Sabah” – “Neftçi” matçından sonra maraqlı hadisə yaşandı.
0:2 hesabı ilə məğlub olan flaqmanın baş məşqçisi Laurentsiu Regekampfa mətbuat konfransında belə sual ünvanlandı:
“Qodsvey Donyo və Yusuf Lavalın gedişinin səbəbi nə idi?” Rumıniyalı məşqçinin cavabı isə hamını təəccübləndirdi: “Özünüz bilirsiz. Yusuf Lavalın 6 aylıq müqaviləsi qüvvədə idi. Biz yeni müqavilə təklif etdik, qəbul etmədi. O, yaydan etibarən Portuqaliyada müqavilə bağlamışdı. Futbolda belə hallar baş verir. Ona uğurlar arzulayıram. Eyni hal Donyo ilə baş verdi. Komandasını dəyişmək istəyirdi. Onu saxlamaq üçün məcbur edə bilməzdik”.
Təcrübəli mütəxəssisin fikiri diqqətimizi çəkdi. Qaydalara görə Laval müqaviləsinin bitməsinə 6 ay qalmış başqa klubla razılaşa bilər. Yayda isə nigeriyalının müqavilə müddətinin sonuna 1 il qalmışdı. Bu necə ola bilər? Məsələ ilə bağlı “Neftçi”nin Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyevə müraciət etdik:
“Burda anlaşılmazlıq olub. Laval 1 il öncədən yox, 6 ay qalmış yeni klubu ilə danışıqlara başlayıb. Rəsmən deyə bilərəm ki, hansısa qayda pozuntusu olmayıb”.
İLKİN SULTANLI
Digər xəbərlər
