AFFA rəsmisi öz komandalarının oyununa pul qoyuluşu edənlər haqda danışmadı
Ötən ilin son aylarında mətbuatda aşağı dəstədə bəzi oyunların nəticələrinin əvvəlcədən razılaşdırılması ilə bağlı xəbərlər yayıldı.
Football-plus.az xəbər verir ki, “qara siyahı”da birinci divizionda keçirilən 10-a yaxın qarşılaşma qeyd olunmuşdu. Bu yöndə xüsusilə MOİK-in iştirakı ilə keçirilən görüşlər daha çox şübhə altına düşmüşdü.
Bugünlərdə məsələ ilə bağlı redaksiyamıza ilginc məlumat daxil olub. Söylənilənlərə inansaq, “hərbçilər”in iki futbolçusu ötən ilin dekabrında hüquq-mühafizə orqanları tərəfindən dindirilib. Hər ikisi sorğu-sual zamanı komandalarının oyunlarına pul qoyuluşu etdiklərini etiraf edib. Dindirilmə zamanı futbolçular MOİK – “Səbail-2” matçında “dənizçilər”in qələbəsinə yatırım etdiklərini boyunlarına alıblar.
Məsələ ilə bağlı UEFA-nın danışılmış oyunlarla bağlı Azərbaycan üzrə nümayəndəsi Seymur Səlimli ilə əlaqə saxladıq. Seymur bəy faktı təsdiq etməsə də, təkzib də etmədi:
“Sizə bu məlumatı kimin ötürdüyünü deyə bilmərəm. Ancaq onu qeyd edim ki, bu yöndə daim iş aparılır. Bəli, bu gün də bizə müəyyən siqnallar çatır. Onların hamısını araşdırırıq. Məxfiliyi qorumaq naminə açıqlama verməyim düzgün deyil”.
Adı xoşagəlməz olayda hallanan Fərmayıl Əliyevlə də danışdıq. Hücumçu qısaca “elə bir şey olmayıb” deməklə kifayətləndi. Qalmaqalda adı hallanan Emin Mehdiyev isə zəngimizi cavabsız qoydu.
Sonda onu da qeyd edək ki, 2016-cı ildə qəbul edilən qanuna əsasən Azərbaycanda idman yarışlarını manipulyasiya edənləri həbs gözləyir:
“İdman yarışlarının manipulyasiyası məqsədi ilə idmançıya, idman hakiminə, məşqçiyə, sponsora və ya digər şəxsə onun özü və ya üçüncü şəxslər üçün birbaşa və ya dolayı yolla, şəxsən və ya vasitəçidən istifadə etməklə, maddi və ya sair nemət, imtiyaz və ya güzəşt təklif olunması, vəd edilməsi və ya verilməsinə görə 3000 manatdan 5000 manatadək cərimə və ya 3 ildən 6 ilədək müddətə azadlıqdan mərhumetmə nəzərdə tutulub”.
RƏŞAD
Digər xəbərlər
