“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Zaman-zaman mövzuların əhatə dairəsini genişləndirməyə, idmanın başqa sahələrini və ordakı mütəxisslərimizi oxucularımıza yaxından tanıtdırmağa çalışırıq. Bu dəfə də prinsipimizə sadiq qalaraq yazını basketbola həsr etmişik. Müsahibimiz də yetərincə tanınmış simadı. NTD basketbol klubunun və Azərbaycanın U-18 yığmasının baş məşqçisi Tahir Baxşıyev bizi maraqlandıran sualları məmnunluqla cavabladı.

- Tahir bəy, adətimiz üzrə sizə də ilk sualımız keçmişlə bağlıdı. Basketbola necə gəldiz? Niyə məhz basketbolu seçdiz?
- Bu gəlişin tarixi uzaq 1996-cı ilə gedib çıxır. Onda mənim heç 14 yaşım da tamam olmamışdı. Evimizin yanında Neft Akademiyasının idman kompleksi var idi və orda trenajora yazılmışdım. Qonşuluqda yaşayan idman mütəxəssislərindən biri dedi ki, sənin üçün trenajorla məşğul olmaq hələ tezdi, gəl səni basketbola yazaq. Elə həmin idman kompleksində basketbol məşqləri keçirilirdi. O dövrün ən güclü məşqçilərindən olan Vladimir Alekseyeviç Sorokin də orda məşqlər keçirdi. Məni onun yanına apardılar. Beləcə basketbolla məşğul olmağa başladım. Əvvəl düşünürdüm ki, elə-belə məşq edirəm. Evdəkilər də istəyirdilər ki, basketbolla məşğul olum. Yavaş-yavaş gördüm ki, basketbol çox maraqlı, hərtərəfli oyundu. Beləcə davam etdim, ömrümü basketbola həsr etdim.

- İlk məşqçinizin Vladimir Sorokin olduğunu dediz. Bəs oynadığınız ilk klub hansı olub?
- Əvvəllər klubumuz “Məhsul” adlanırdı. Sonradan klubun adı “Bakılı” oldu.

- Həm basketbolçu, həm də məşqçi kimi karyeranıza nəzər salanda hansı məqamları daha çox xatrırlayırsız. Sizin üçün uğurlu dövrlər, nəticələr hansılar olub?
- Gənclik illərimiz çox maraqlı keçib, xatirələr çoxdu. 2005-ci ildə Səudiyyə Ərəbistanında keçirilən 1-ci İslam Oyunlarında qalib olduq. Orda 5x5 şəklində, klassik basketbol yarışları idi. O günləri heç vaxt unutmaram. Çox gərgin mübarizə aparırdıq, çempionluğa gedən yolda xeyli çətin görüşlər keçirdik. Qrupda iki oyunda məğlub olmuşduq. Buna baxmayaraq, sonda çempion olmağı bacardıq. 2006-cı və 2008-ci illərdə C dvizionunun çempionu olmuşuq. Bütün bu nəticələr xatirələrimdə qalıb. 2011-12-ci illərdə də çox maraqlı oyunlar keçirmişik. Sonda bir oyuna görə son 24 komandanın sırasına düşə bilmədik. İsveçə səfərdə uduzmuşduq. 14 xallıq fərqlə səfərdə məğlub olmuşduq. Bakıda onlara 7 xallıq fərqlə qalib gəldik. Məşqçi kimi unutmadığım uğur 2018-ci ildə U-18 yığmasıyla C dvizionunda qalib olmağımızdı. Bu il isə bürünc medal qazandıc, C dvizionunun üçüncüsü olduq.



- Futboldakı problemlərimiz məlumdu. Avropa səviyyəli idmançılar, legioner həyatı yaşaya bilən fubolçular yetişdirə bilməmişik. Basketbolda vəziyyət necədi?
- Mənim yetirmələrimdən legioner həyatı yaşayanlar olub. Endar Poladxanlı Fransada, Çexiyada və Türkiyədə oynayıb. Onun kimi NTD məktəbinin yetirməsi Əkbər Məmmədli İspaniyada çıxış edib. Hüseyn Qaflanovun 2,06 metr boyu var, cəmi 14 yaşındadı. Litvada MBA basketbol məktəbindəki seçimlərdən uğurla keçib, orda məşq edir. Bizim böyük hədəfimizdi ki, azərbaycanlı uşaqlar xaricdə ölkəmizi uğurla təmsil etsinlər. Amma bu çox ciddi işdi, çalışmaq lazımdı. İnanıram ki, gələcəkdə bunu da görəcəyik.

- Basketbolçu olmaq istəyən uşaqlarda hansı keyfiyyətlər olmalıdı? Həmin uşaqlar və onların valideynləri ən çox nəyə diqqət etməlidilər?
- Basketbolda genetik amillər vacibdi. Boy hündür olmalıdı, çünki basketbol ucaboy adamların oyunudu. Balacaboylar da basketbolçu ola bilər. MBA-da yetərincə çox belə oyunçu var. Amma onlar əzmkarları, çalışqanlıqları ilə məqsədlərinə nail olublar. Valideynlərdən də çox şey aslıdı, onların üzərinə böyük məsuliyyət düşür. Valideynlər uşaqlarına həmişə diqqət göstərməlidi. Çalışmalıdı ki, uşaqlar idmanı sevsin. İşin 80 faizi uşağın özündən asılıdı. Uşaq nə qədər çox çalışsa, ürəklə məşq etsə, tapşırıqları yerinə yetirsə, o da yaxşı basketbolçu ola biləcək.

- Bu ildən Azərbaycan çempionatı da keçirilir. Çempionatın səviyyəsini, rəqabəti necə qiymətləndirirsiz?
- Bildiyiniz kimi, mən yığma komanda ilə yanaşı, NDT-də də çalışıram. Ona görə də çempionatdakı mübarizəni də yaxından izləyirəm, bu mübarizənin içindəyəm. Bu il çempionat çox güclü keçir. Həm də xeyli maraqlıdı. Səviyyə yüksəlib. Deyərdim ki, builki çempionat indiyə qədər keçirilənlər arasında ən güclüsüdü. İllərdi basketbolla məşğulam. Tam əminliklə deyirəm ki, ən güclü rəqabət, ən böyük maraq məhz bu ildi. İnanıram ki, bu rəqabət də Azərbaycanda basketbolun inkişafına böyük təkan verəcək.

İLKİN SULTANLI




Yazı Azərbaycan Respublikasının Medianın İnkişafı Agentliyinin maliyyə dəstəyi ilə, “Uşaq və gənclərin fiziki və mənəvi inkişafı” istiqaməti üzrə hazırlanıb.