Azərbaycanda qızlar üçün cüdo klubu fəaliyyətə başladı
Azərbaycan Cüdo Federasiyası tərəfindən ilk dəfə pilot layihə olaraq ancaq qız idmançıların cüdo idman növü ilə məşğul olduğu klubun yaradılmasına dəstək verilib.
Football-plus.az xəbər verir ki, Əhmədli qəsəbəsində fəaliyyət göstərən klubda hazırda 40 nəfər yeniyetmə qız ödənişsiz olaraq cüdo idman növü ilə məşğul olurlar. Dərslər dünya və Avropa mükafatçısı Kifayət Qasımova və paracüdo üzrə dünya və paraolimpiya çempionu Afaq Sultanova tərəfindən keçirilir.
Kifayət Qasımovanın sözlərinə görə, klubda qızların yüksək səviyyədə cüdo ilə məşğul olması üçün bütün şərait yaradılıb:
“Artıq qısa zamanda biz cüdo ilə məşğul olan qızların sayını artırmışıq. Klubun sırf qızlar üçün olması böyük bir üstünlük kəsb edir. Valideynlər bu təşəbbüsü çox yaxşı qarşılayırlar, həmçinin qızlar özünü məşq zamanı rahat hiss edirlər. Azərbaycan Cüdo Federasiyasına yaradılan imkana görə təşəkkür edirik. İnanırıq ki, yaxın gələcəkdə regionlarda da bu cür cüdo klublar və məktəblər fəaliyyətə başlayacaqdı”.
Qeyd edək ki, Azərbaycan Cüdo Federasiyasının əsas fəaliyyət istiqamətlərindən biri ölkədə qızlar arasında cüdo idman növünün kütləvləşdirilməsi və beynəlxalq turnirlərdə qadın cüdoçularımızın təmsilçiliyini artırmaqdı.
Ünvan: Əhmədli qəsəbəsi, M.Hadi 51M, Ukrayna dairəsi (Xətai rayon məhkəməsinin yanı)
Əlaqə nömrəsi: +994 70 657 67 15; +994 50 787 57 04
Digər xəbərlər
