Mövsümün ən gənc futbolçusu

Misli premyer-liqasının 17-ci turu çərçivəsində keçirilən “Sumqayıt” – “Səbail” (2:0) qarşılaşması futbolçu Nihad Əhmədzadə üçün əlamətdar olub.

Football-plus.az xəbər verir ki, "kimyaçılar"ın Futbol Akademiyasının yetirməsi olan yarımmüdafiəçi 16 yaş 144 günlüyündə adıçəkilən matçın 80-ci dəqiqəsində Todor Todoroskinin əvəzinə meydana daxil olmaqla Azərbaycan çempionatlarında debüt edib.

Nihad, həmçinin cari mövsümdə pemyer-liqada meydana çıxan ən gənc futbolçu ünvanına sahib çıxıb.

Xatırladaq ki, klubun tarixində Nihad Əhmədzadədən öncə Səbuhi və Rüfət Abdullazadələr də ən gənc futbolçu ünvanına sahib çıxıblar. Belə ki, baş məşqçimiz Samir Abasov 2017/18 mövsümündə “Sumqayıt”ı çalışdırarkən Səbuhi Abdullazadə komandamızın heyətində debüt etməklə premyer-liqanın tarixinə düşmüşdü. O zaman Səbuhinin 15 yaşı var idi.