"Öncə qətiyyətlə qeyd edim ki, nə hakimlərin, nə də federasiyanın ünvanına təhqir, söyüş işlətmişəm. Qarşılaşmadan öncə hakimlər briqadasıyla salamlaşıb görüşmüşəm. Oyun zamanı da dava böyüməsin deyə meydana daxil oldum ki, baş məşqçimizi və futbolçuları sakitləşdirim. Futbolda dava, qarşıdurma ola bilər, burda qeyri-adi nəsə yoxdu. Baş hakim bizə qarşı olduqca qərəzli idarəçiliklə yadda qaldı. Mən də buna görə ona fikrimi dedim. Söyüş-təhqirdən söhbət gedə bilməz. Hakim oyundan sonra sağollaşmaq üçün əl uzadanda sıxmadım, əli havada qaldı. Etdiyim bu hərəkəti də klub rəhbərliyinə şəxsən demişəm. Sonra referi mənə hakim-inspektor Munis Abdullayevin yanında dedi ki, "sizin jestinizi də hesabata daxil etmişəm”. Hakimə qarşı etdiyim bu hərəkətə görə peşman deyiləm. Bunu da təhqir kimi qiymətləndirib İntizam Komitəsinə təqdim ediblər və mənimlə bağlı məlum cəza təyin olunub. "Səbail" rəhbərliyinə mənə etibar edib arxamda durduğuna, haqqımda çıxarılan qərardan apellyasiya şikayəti verdiyinə görə minnətdaram. Klubumun arxamda dayanması mənim üçün ən böyük dəstəkdi. Apellasiya şikayətimiz təmin olunmayıb qərar qüvvədə qalsa, İntizam Komitəsinin qərarına hörmətlə yanaşacam".

“Erkin bəyin hansı intizam cəzalarını qeyd etdiyini bilmirəm. Mən bu il ərzində cəmi 1 dəfə, 8 ay əvvəl 10 oyunluq cəza almışam. Həmin məsələyə də qayıtmaq istəmirəm. Yəni dəfələrlə cəza almamışam".