AGİN-in balansında olan komplekslərdə fərqli mühafizə və təhlükəsizlik sistemi var
Noyabrın 26-da “Arifoğlu” cüdo klubunun Şağan Olimpiya İdman Kompleksində təşkil etdiyi turnirdə Ruslan Səfixanovun şəxsi münaqişə zəminində Tural Rüstəmovu bıçaqlayaraq qətlə yetirməsi ölkə gündəmindən düşmür. İstintaqın davam etməsiylə yeni faklar üzə çıxır.
Bizə maraqlıdı: Gənclər və İdman Nazirliyi niyə sərəncamında olan Olimpiya İdman Kompleksində təhlükəsizliklə bağlı vaxtında tədbirlər görməyib? Ümumiyyətlə, belə qurğularda təhlükəsizlik məsələləri necə tənzimlənir? Bunu aydınlaşdırmaq üçün nazirliyin mətbuat katibi Qabil Mehdiyevlə əlaqə saxladıq:
"Olimpiya İdman Komplekslərində fərqli mühafizə və təhlükəsizlik sistemi var. Hər cür mühafizə-təhlükəsizlik sistemi, o cümlədən rentgen aparatlarına qədər olan komplekslər var. Yalnız mühafizəçilərlə kifayətlənənənlər də fəaliyyət göstərir. Yəni hər qurğuda fərqlidi. Qətl hadisəsindən öncə cinayəti törədən şəxs bıçaqla içəri daxil olub. Onu yoxlamayıblar. Adətən, idmançıların üst-başını yoxlamırlar. Heç kim inanmazdı ki, idman tədbirində belə bir qətl törədilər. Hadisə qəfil baş verib. İstintaq davam edir. Hadisəylə bağlı yeniliklər olsa, ictimaiyyətə əlavə açıqlama verəcəyik".
Görəsən, nazirlik dayanıqlı mühafizə təşkil etmədiyinə görə Şağan Olimpya İdman Kompleksinin rəhbərliyi haqda hansısa ölçü götürübmü və ya bu yöndə addım atmağı düşünürmü? Təəssüf ki, Qabil bəy bu sualımıza cavab vermədi. Onu da xüsusi qeyd edək ki, qətl baş verəndən sonra nazir Fərid Qayıbov şəxsən hadisə yerinə gedib.
ABDULLA İSMAYILOĞLU
