"Oyuna çox ciddi hazırlaşmışdıq. Çünki Samir Abasovun gəlişindən sonra ciddi dəyişikliklər olmuşdu. "Neftçi"yə qarşı oynadıqları oyun da bunu göstərdi. 3-4 oyunlarını analiz etdik və boşluqlarını gördük. Hazırlaşdıq və uşaqlar verilən tapşırıqları istədiyimiz kimi yerinə yetirə bildilər. Baxımlı və əzmkar futbol oynadılar. Bəzən deyirlər ki, hər dəfə eyni sözləri danışıram. Amma bu uşaqlara güvənmək lazımdı. Hər dəfə qeyd edirdim ki, oyundan-oyuna inkişaf edəcəyik. Çünki onların necə hazırlaşdıqlarını görürük. Bu da özünü göstərir. İş günü olsa da, azarkeşlər bizi tək qoymadılar. Onlara da təşəkkür edirəm. "Sumqayıt"a da gələcək matçlarda uğurlar arzulayıram".

"Footbal-plus.az" xəbər verir ki, bu sözləri "Şamaxı"nın baş məşqçisi Vüqar Əsgərli deyib.

O, premyer-liqanın 14-cü turunun "Sumqayıt"la (4:2) oyunundan sonra mətbuat konfransında iştirak edib.

- "Sumqayıt"dakı boşluqlar nədən ibarət idi?

- Yarımmüdafiə və müdafiə xətti arasında boşluqları var idi. Bilirdik ki, onlar cərimə meydançasının içərisində kompakt oynayırlar. Belədə, demək ki, cinahlarında boşluqları var idi. Cinahların aktiv olmasına çalışdıq.

- Bundan əvvəlki turlarda qol vurmaqda çətinlik çəkirdiz. Amma sin iki tura 7 qol vurmusunuz. Əvvəl problem nədə idi?

- Futbolçularımız təcrübəsiz idi. Əvvəlki oyunlarımıza baxırdıq, qol imkanları yaradırdıq, amma reallaşdıra bilmirdik. Məşqlərdə futbolçularımızla fərdi də işləyirik ki, epizodu qola çevirsinlər. İkinci dövrə başlayandan hər oyun qol vururuq. Məğlub da olmuruq. Bu, sevindiricidi. İki oyun qələbə qazanmaq da hər şey demək deyil. Çünki futbolçuların üzərində təzyiq olur ki, təsadüf qələbə qazandılar. Sevinirik ki, qolları hücumda olanlar vurur.

- Texniki zonada daha çox ayaqüstə olan Cavid Hüseynov idi...

- Cavid və Vüqar eynidi. Hərəmizin öz işi var, bunu bölüşdürmüşük. Məşqlərdə və texniki zonada öz işimizi görürük. Fərqi yoxdu, hər ikimiz eyni fikirləşirik. İkimizdən biri olmasa da, futbolçular eyni fikirlə davam edirlər.

- PRO lisenziyasına da yiyələndiniz. Bildiyimiz qədərilə oyun analizlərində də yaxşısınız. Cavid Hüseynovla bir növ qardaş kimi olduğunuzu deyirsiniz. Maaş məsələsində də qardaş kimisiz?

- Bəli. Bizim üçün pul o qədər önəmli deyil. Eyni dəyəri alırıq. Bura gələndə ağ kağız vermişdik və maaşın o qədər də önəmli olmadığını bildirmişdik. Çünki ilk işimizdi və özümüzü göstərmək istəyirdik. Elə bu uşaqlarla özümüzə inanırdıq. Məşqçilər şanslıdı ki, bizim maariflənmənin rəhbəri Aslan Kərimovdu. Onun futbol savadı, təcrübəsi bizə kifayət qədər məlumatlar verir. Orada özümüzü inkişaf etdiririk. İki ildən artıq oxuduq PRO lisenziyasını. Orada tək fiziki, texniki tərəfdən deyil, həm də oyun analizlərinə də üstünlük verirdik. Aslan Kərimovun da böyük əziyyəti oldu. Hər məşqçinin həyatında olmalıdı. PRO lisenziyası almamışdan qabaq premyer-liqada işləməyə başladım. Bundan sonra "Şamaxı" ilə liqada daha iddialı olmaq istəyirik.