Həftəiçi gənclər və idman naziri Fərid Qayıbov Gəncə şəhər stadionuna baş çəkib.

Klubun rəsmiləri və baş məşqçisi ilə görüşən Fərid bəy arenanın qəzalı tribunları ilə tanış olub, rəsmilərlə fikir mübadiləsi aparıb. Nazirin səfəri zamanı diqqət çəkən məqam onun hava qaralandan sonra stadiona gəlməsi və telefon işığında stadionun vəziyyəti ilə tanış olmasıdı.
Gəncədəki mənbəmizdən əldə etdiymiz bilgiyə əsasən Fərid bəyin Gəncəyə səfər etməsində əsas məqsəd şəhərdə inşa olunan yeni idman sarayında görülən işlərlə tanış olmaq olub. Orda nəzərədə tutulduğundan çox qaldığından stadiona hava qaralandan sonra baş çəkmək məcburiyyətində qalıb.

Xatırladaq ki, Qayıbovdan öncə isə şəhərin icra başçısı Niyazi Bayramov və Milli Məclisin bu şəhərdən olan deputatı Müfiq Cəfərov da arenanın vəziyyəti ilə tanış olmuşdular. Rəsmilərin ard-arda stadiona gəlişindən sonra düşünmək olar ki, mövsümün əvvəlindən ev oyunlarını Mərdəkan və Qəbələdə keçirən “Kəpəz”in Gəncəyə qayıdışı reallaşacaq. Mənbəmizin sözlərinə inansaq, artıq bu məsələ həllini tapıb. “Kəpəz” Gəncədə ilk oyununu oktyabrın 16-da keçiriəcək. Həmin gün premyer-liqanın 10-cu tur çərçivəsində “sarı-göylər” “Neftçi”ni qonaq edəcəklər. Bu barədə bizə məlumat verən şəxs onu da bildirdi ki, azarkeşlərin stadiona girişi məhdud sayda olacaq.

RƏŞAD