Avrokuboklarda bir matçın təxirə salınacağını xəbər vermişdik.

Football-plus.az Avropa Liqasında (AL) bu günə təyin olunan “Arsenal” – PSV oyunu ertələnib.

Bu qərar Böyük Britaniya kraliçası II Yelizavetanın sentyabrın 8-də 96 yaşında vəfatına görə verilib. Paytaxt Londonda mərhumə kraliçanın dəfni ərəfəsində polis qüvvələrində ciddi məhdudiyyət yarandığından bu gün Avropa Liqası oyununun təşkilində problemlər ortaya çıxıb. Ümumiyyətlə, Böyük Britaniyada ötən həftəsonuna təyin olunan bütün idman yarışlarının qeyri-müəyyən müddətə təxirə salındığını da bildirək. AL-in qrup mərhələsinin 2-ci turunun oyunu oktyabrın 20-nə təyin olunub.

Bir təxirəsalma digərini qaçılmaz edib. Belə ki, İngiltərə premyer-liqasının 12-ci turunun oktyabrın 19-na təyin olunan “Arsenal” - “Mançester Siti” matçı londonluların PSV ilə görüşünə görə ertələnib. Yeri gəlmişkən, təhlükəsizliyin təmini planında ehtimal olunan problemlərə görə ölkə çempionatının 8-ci turunun “Çelsi” – “Liverpul”, “Mançester Yunayted” – “Lids” və “Kristal Pelas” – “Brayton” oyunları da qeyri-müəyyən müddətə təxirə salınıb.