Konspirasiya nəzəriyyəsinə inanmırsız? Amma “Barselona” inanır və bu üzdən Antuan Qrizmannın “Atletiko”nun əsas heyətində olmamasına görə panikaya düşür.

Hələ də kataloniyalılara məxsus olan fransalı hücumçu madridlilərin heyətində icarə əsasında çıxış edir. Ötən yay tərəflər sonradan daha bir mövsüm uzadılmaq və 40 milyona transfer hüququnu ələ keçirmək şərti ilə birillik müqaviləni 10 milyon avroya razılaşdırdılar. Ünlü futbolçu Madridə dönmək xatirinə hətta maaşının üçqat azaldılmasına da razılıq verdi.

Daha bir vacib detal var – Qrizmann ik mövsüm ərzində Simeonenin komandasında oyunların 50 faizində 45 dəqiqədən az oynamasa, “Atletiko”nun onu alması məcburidi. Bu statistikada cəza və zədələr nəzərə alınmır, yəni Antuanın meydana çıxmaq imkanının olduğu oyunlar hesablanır. Ötən mövsüm işlər qaydasında getdi: oyunların 82 faizi müqavilə meyarlarına uyğun gəldi. Ancaq bu mövsüm vəziyyət dəyişib.
Çempionatın ilk iki turunun hər birində Antuan 28 dəqiqə oynadı ki, belə durum kataloniyalıları qətiyyən qane etmir. Onlar Qrizmannın əsas heyətə salınmamasını 32 yaşlı hücumçunu ciddi məbləğ qarşılığında almaq istəməyən madridlilərin hiyləgər planı sayırlar. Ya da bəlkə “Atletiko”nun buna imkanı yoxdu. Axı təkcə “Barsa” maliyyə çatışmazığından əziyyət çəkmir, ümumilikdə La Liqada bu mənada durum gərgindi. La Liqada maliyyə çətinlikləri yayın trendinə çevrilib. “Barsa”nın əzab-əziyyəti haqda dəfələrlə yazmışıq, ancaq başqaları da eyni vəziyyətdədi, sadəcə, səs-küy salmırlar. Məsələn, “Almeriya” məcburiyyət üzündən lideri Umar Sadiki satır, çünki yalnız bu yolla yeniləri qeydiyyatdan keçirmək mümkündü. “Betis” “Lion”dan Ussem Auarı və ya Ektor Belyerini ala bilmir – xərclər tavanına uyğunlaşa bilməyəcək, ya da dayaq yarımmüdafiəçisi Vilyam Karvalyonu satmalı olacaq.

“Marca” hesab edir ki, bütün bunların günahı çempionatın yayın hüquqlarının 10 faizini “CVC Capital Partners”ə satmağı nəzərdə tutan sövdələşmənin üzərindədi. “Elçe”nin sabiq idman direktoru Niko Rodrigesin fikrincə, La Liqa klubları müqaviləni imzalamağa tələsib. AS isə əlavə edir ki, CVC-nin ödənişləri nəhənglər bu sövdələşmədən imtina etdiyinə görə ləngiyir.

Birbaşa paralellər aparmaq baxımından hələ tez olsa da, acınacaqlı mənzərə yaranıb: La Liqa klubları bu yay cəmi 420 milyon xərcləyib. Bu isə Liqa 1 ilə müqayisədə cəmi 12 milyon artıqdı. Başqa “böyük beşlik” ölkələrinin klubları yetərincə çox xərcləyib. “Atletiko” da ən çox zərər çəkənlərdən biridi.
• Klub ötən il La Liqa rəhbərliyi ilə problemdən qaçmaq üçün bir milyona yaxın yeni səhm buraxmalı oldu. Prezident Enrike Sereso ABŞ-dan olan fond hesabına kapitalı 180 milyon avro artırdı. “Marca”nın yazdığına görə, bunun ardından klub daha 300 milyonluq qısamüddətli istiqraz götürüb.
• Rəhbərliyin növbəti addımı əməkhaqqı fondunu azaltmaqdı. Klub elə həmin Qrizmanndan, eləcə də Joao Felişdən, Kokedən, Yan Oblakdan və Toma Lemardan maaş azalmasına razılıq verməyi xahiş edir. Hələ ki Dieqo Simeonenin müqaviləsinə dəymirlər.
• “Atletiko” hətta “WhaleFin”in şəxsində yeni sponsor da tapıb. Madridlilərə bir il ərzində 40 milyon avro qazandıracaq sponsorluq müqaviləsi klub tarixinin ən nəhəng sövdələşməsidi. “Atletiko” həmçinin stadionun adını “Civitas” tikinti şirkətinə 10 illiyə satıb və buna görə də hər il 10 milyon avro qazanacaq.
Kriştiano Ronaldonun “Atletiko”ya keçəcəyi ilə bağlı şayiələr gəzərkən Sereso tez-tez deyirdi ki, müxtəlif səbəblərdən bu sövdələşmə mümkün deyil. İqtisadi səbəb bunlardan birincisidi. O da maraqlıdı ki, “Mundo Deportivo” Madrid klubunun borclara rəğmən, “Renn”in xavbeki Lovro Mayerə görə 50 milyon xərcləməyə hazır olduğunu xəbər verir. Belə mənzərə sizə kimisə xatırlatmır? Bəs Qrizmannın alınması ilə bağlı məsələ necə tənzimlənəcək – bu artıq böyük sualdı.