Yığmanın iyuna təsadüf edən Millətlər Liqasındakı oyunlarından sonra Canni de Byazini Azərbaycanda görən olmayıb.

Ölkənin əsas komandasının çalışdırıcsı artıq iki aya yaxındı vətəni İtaliyada istirahət edir. Nə bilmək olar, bəlkə də İtaliya ilə yanaşı, Avropanın başqa dilbər güşələrinə də baş çəkib. Əslində onun harda və kiminlə istirahət etməsi bizi maraqlandırmamalıdı. Şəxsi həyatı, öz cibidi. İstəyər, Apennin yarımadasında günəş vannası qəbul edər, istəyər, Alp dağlarında ov ovlayar, quş quşlayar.

Bizi maraqlandıran başqa məsələdi. Görəsən, çox hörmətli baş məşqçi Azərbaycana nə vaxt qayıdacaq? Sentyabrda millini Millətlər Liqasında daha iki qarşılaşma gözlədiyini nəzərə alsaq, məntiqlə, italyan çalışdırıcı yığmaya potensial namizədləri istər avrokuboklarda, istərsə də yeni start götürən premyer-liqada yaxından izləməli, köməkçiləri ilə birgə klublarında fərqlənənlərin, özünü yaxşı tərəfdən göstərənlərin adlarını dəftərinə qeyd etməlidi. Ancaq nə özü gözə dəyir, nə də köməkçi həmyerliləri. Deyəsən, bu missiya yalnız Arif Əsədovun ayağına yazılıb. Yığmanın məşqçilər korpusunda yer alanlardan ancaq Arif bəyi tribunalarda görmək mümkündü.

De Byazinin harda olduğunu və nə vaxt Bakıya gələcəyini dəqiqləşdirmək üçün AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdulla ilə danışdıq. Assosiasiya rəsmisi ölkənin bir nömrəli komandasının çalışdırıcısının avqustun 14-də Bakıya dönməli olduğunu bildirdi.

RƏŞAD