Mövsümlərarası fasilədə “Sumqayıt”ın vidalaşdığı futbolçulardan biri də Höccət Haqverdi olduğundan xəbəriniz var.

Football-plus.az olaraq “kimyaçılar”ın millinin də şərəfini qoruyan müdafiəçini Təbriz “Traktor”una satdığını, bu transferdən təxminən 100 min dollar qazanacağını xəbər vermişdik.
Lakin bu gün etibarlı mənbədən əldə etdiymiz məlumata görə, Höccət yenidən “gənclik şəhəri”nin düşərgəsinə qayıdıb. Görəsən, nə baş verib, yığma üzvü hansı səbəbdən yenidən Azərbaycana qayıtmaq məcburiyyətində qalıb?
Bu suallara cavab tapmaq üçün “Sumqayıt” rəhbərliyinin fikirini öyrənməyi lazım bildik. Təəssüf ki, rəsmilərdən heç kim zənglərimizə cavab vermədi.

Ancaq qeyri-rəsmi də olsa, məsələ ilə bağlı müəyyən məlumat əldə etdik. Mənbəmizin sözlərinə inansaq, Höccət yeni klubunda problemlə üzləşib. Müdafiəçi “Traktor” rəhbərliyi ilə bəzi məsələlərdə ortaq məxrəcə gələ bilmədiyindən komandanın düşərgəsindən ayrılaraq sabiq klubuna dönüb. Hadisələrin axarından asılı olaraq, futbolçunun İrana qayıdacağına və yaxud Azərbaycanda qalacağına yaxın günlərdə aydınlıq gələcək. Hələlik isə Haqverdi formada qalmaq üçün “Sumqayıt”ın düşərgəsində məşq etməkdədi.

RƏŞAD