“Buraxdığımız kobud səhv matçın taleyini həll etdi” - Rəşad Sadıqov
Misli premyer-liqasında 2-ci tura start verilib.
İlk matçda “Zirə” “Sabah”ı qəbul edib. Qonaqlar 3:1 hesablı qələbəyə sevinib. Oyundan sonra meydan sahiblərinin baş məşqçisi Rəşad Sadıqovun mətbuat konfransı keçirilib. O, fikirlərini bölüşüb:
“Son zamanlar çox rahat qol buraxırıq, həm də ucuz səhvlərdən. Belədə istədiyimiz oyunu göstərmək çətin olur. Bundan sonra rəqib daha inamlı oynadı. Fərqi azaltdıqdan sonra ümidləndik. Amma ikinci hissənin əvvəlində buraxdığımız kobud səhv matçın taleyini həll etdi”.
- Sanki Təmkin Xəlilzadə eniş yaşayır...
- Mövsümün əvvəlidi. Ola bilər ki, kimsə gec formaya düşsün. Təkcə o yox, bir neçə oyunçumuz daha istəkli olmalıdı. Problemləri axtarıb, həll etməyə çalışacağıq.
- Hamidu Keytanın yoxluğu məğlubiyyətdə nə qədər rol oynadı?
- Heyətimiz geniş deyil. Onun yoxluğu hücumda özünü hiss etdirməyə bilməz. Hacıağa Hacılı, Dmitrios Çantakias da yoxdu. Filipe Paxtman yenidən zədələnib. Heyətdə itkilərimiz var. Futbolda belə problemlər olur. Qarşıda bizi 34 tur gözləyir. Əsas məsələ mövsümü uğurlu başa vurmaqdır. Problemləri mövsümün əvvəlində görmək daha yaxşıdı.
- Transfer çalışmaları nə yerdədi? Hansı mövqelərə oyunçu axtarırsız?
- Bir neçə mövqeyə. Heyəti genişləndirməliyik. Az oyunçu olması futbolçularda rahatlıq yarada bilər. 4-5 futbolçu transfer etmək istəyirik. Biri ilə razılaşmışıq, iki günə Bakıda olmalıdı. Baxacağıq, olmasa, qışda oyunçular gətirəcəyik.
- Bu gün yaxşı nəticə üçün nə çatmadı?
- Əvvəla ucuz qollar buraxmamaq lazımdı. Belə olanda oyunu dəyişmək çox çətin olur. Daha aqressiv, istəkli olmalıydıq. Belə oynadıqdan sonra bu cür rəqibə qarşı şans olmur.
- Təl-Əviv “Makkabi”si ilə Konfrans Liqası oyunlarındakı “Zirə”ni çempionatda görmürük...
- Son iki görüşdə aqressivlik və dinamikanın aşağı düşdüyünü görürəm. Səbəbini araşdıracağıq. Mənim üçün də naməlumdu.
Digər xəbərlər
