Avqustun 5-də “Dalğa Arena”da Əliyar Ağayevin start fiti ilə 31-ci ölkə çempionatına start verdildi.

Mövsümün ilk oyununda tribunaların qəzalı olması səbəbindən Gəncədən qaçaq düşən “Kəpəz” Mərdəkanda “Zirə”ni qəbul edirdi. Matçdan öncə çoxları Rəşad Sadıqovun komandasının “sarı-göylər”ı asanlıqla yenəcəyini güman etsə də, Yaşar Vahabzadənin yetirmələri daha keyfiyyətli heyətə malik qəsəbə təmsilçinə qarşı layiqli mübarizə apardı. Gəncəlilər çox çalışsalar da, 2022/23 “futbol ili”nin ilk turunu xalla başa vura bilmədilər. “Qartallar” əsas vaxtın son 7 dəqiqəsini azlıqda keçirməyinə baxmayaraq, 4-cü uzatma dəqiqəsində qələbə qolunu vurmaqla hesabına 3 xal yazdırdı. 4 ildən sonra premyer-liqaya dönən “Kəpəz” ilk oyununu xalsız başa vursa da, heç də pis təsir bağışlamadı.

Turun ikinci oyun günündə azarkeşlər bir qarşılaşmaya şahidlik etdi. Həftəiçi Çempionlar Liqasının oyununda “Ferntsvaroş”la heç-heçə edən “Qarabağ” Suraxanıda yay fasiləsində yeni baş məşqçisinə qovuşan “Səbail”lə qarşılaşdı. Qurban Qurbanovun komandasının meydana ikinci heyətlə çıxacağı bəlli idi. Ancaq bu gün üçün ölkənin “bir nömrəsi” olan kollektivdə birinci və ya ikinci heyət anlayışının olmadığını bu matç da göstərdi. Mahmud Qurbanovun çalışdırdığı “dənizçilər” 42 dəqiqə qapısının toxunulmazlığını təmin edə bildi. Düzdü, qapısında qol görənə qədər “Səbail” də bir neçə dəfə hesabı açmağa yaxın oldu. Ancaq qonaqlar real qol şanslarını sağa-sola xərclədisə, meydan sahiblərinin ilk ciddi həmləsi qolla nəticələndi. Ardınca isə növbəti qollar gəldi. Qonaqların gücü yalnız təsəlli qoluna çatdı. Çempionatın ilk oyununda hesabına 3 xal yazdıran “köhlən atlar” bununla da Macarıstana yüksək əhval-ruhiyyədə yollandı.



Vitse-çempion “Neftçi” də premyer-liqanın ilk turundan əvvəl Konfrans Liqasında “Rapid”lə çətin oyundan çıxmışdı. İlk görüşdə qeydə alınan nəticədən sonra “ağ-qaralar”ın baş məşqçisi Regekampfın hamının autsayder gözündə gördüyü “Şamaxı” ilə oyunda daha çox ehtiyat qüvvədən yararlanacağı gözlənilirdi ki, məhz belə də oldu. Düzdü, “ağ-qaralar” oyunu qələbə ilə başa vurdu, ancaq Vüqar Əsgərlinin baş məşqçi olduğu komandanın adlı-sanlı rəqibə layiqincə müqavimət göstərdiyini də vurğulamaq lazımdı. Bəlkə də Emin Mahmudovun 81-ci dəqiqədə vurduğu kuryoz qol olmasaydı, “şirlər” mövsümün ilk sensasiyasına imza atacaqdı.



Artıq neçə mövsümdü çempionatın əvvəlində “Sabah”ın ən azı mükafatçılar sırasında olacağı deyilir. Ötən mövsümdə də belə idi, ondan əvvəl də. Ancaq hər dəfə “tələbələr” ümidləri doğrultmur, müəyyən səbəblərdən avrokuboklardan kənarda qalırdı. Deyəsən, bu il xoşagəlməz ənənəyə son qoyulacaq. Murad Musayevin komandası hər matçda “Sumqayıt”la görüşdə olduğu kimi oynasa, bəlkə də çempionatın sonunda gümüş medalları boynundan asa biləcək. “Sumqayıt”la qarşılaşmada hər xətdə balanslaşdırılmış heyətə malik komanda gördük. İstər müdafiə, istər yarımmüdafiə, istərsə də hücum xətti çox yaxşı təsir bağışladı. Xüsusilə yarımmüdafiəni qeyd etmək lazımdı. Müdafiə ilə hücum arasında “körpü” rolunu oynayan mövqedə çıxış edən futbolçular üzərinə düşən missiyanı keyfiyyətlə yerinə yetirdilər ki, məhz buna görə “tələbələr” ilk oyunda böyükhesablı qələbəyə sevindilər. Eyni sözləri “Sumqayıt” haqda demək absurd olar. Aleksey Baqanın çalışdırdığı komanda belə oyunla, çətin ki, çempionatda nəyəsə ümid etsin. Yalandan transfer xatirinə transfer etmək, qaradərili futbolçuları heyətə cəlb edib “bizim də legionerimiz var” prinsipi ilə davranmaq, görəsən, klub rəhbərliyinə nə verəcək? Keyfiyyətisz əcnəbilərlə belə biabırçı oyun nümayiş etdirib, autsayder olmaq əvəzinə akademiyanın yetirmələri ilə sonuncu olmaq daha məqsədəuyğundu. Ən azı yerli futbolçuların inkişafına nail olarsan, ölkə futboluna yeni simalar bəxş edərsən.



Və nahəyət, hesabat turunun son qarşılaşması Tovuzda keçirildi. “Boz qurdlar” doğma azarkeşləri qarşısında “Qəbələ ilə üz-üzə gəldi. Mövsümlərarası fasilədə, demək olar, sıfırdan qurulan kollektiv çox çalışsa da, “qırmızı-qaralar”a müqavilmət göstərə bilmədi. 32-ci dəqiqədə azlıqda qalan meydan sahibləri fasiləyə qədər qapısının toxunulmazlığını qorusa da, 2-ci yarıda üstünlüyə yiyələnən qonaqlar Ayxan Abbasovun komandasını iki dəfə mərkəzə dəvət etməklə yeni mövsümə qələbə ilə start verdi.



Yeri gəlmişkən, ilk turda azarkeşlər ümumilikdə 13 qol gördü ki, bu da hər oyuna ortalama 2,6 edir. Etiraf edək ki, mövsümün əvvəli üçün heç də pis göstərici deyil. 5 qarşılaşmadan üçündə qonaqlar, ikisində isə ev sahbləri qələbəyə sevindi.

Misli premyer-liqası
1-ci dövrə, 1-ci tur

5 avqust
Kəpəz – Zirə 1:2

6 avqust
Qarabağ – Səbail 3:1

7 avqust
Şamaxı – Neftçi 0:1
Sabah – Sumqayıt 3:0

8 avqust
Turan Tovuz – Qəbələ 0:2

Növbəti turun oyunları: 12 avqust – Zirə - Sabah, 13 avqust – Sumqayıt – Qarabağ, Səbail – Turan Tovuz, 14 avqust – Qəbələ - Şamaxı, Neftçi – Kəpəz.

RƏŞAD