Artıq neçə illərdi ki, mövsümün ilk turunun açılış oyununda meydana çıxan komandaların kapitanları hakimin start fitindən əvvəl Azərbaycan himninin sədaları altında üçrəngli bayrağımızı havaya qaldırmaqla yadda qalırdılar.

Ancaq nədənsə, 2022/23 “futbol ili”nin birinci turu çərçivəsində “Dalğa Arena”da baş tutan “Kəpəz” – Zirə” görüşündə bunu görmədik. Matçdan əvvəl himn səslənsə də, nə nominal ev sahiblərinin kapitanı Tural Axundov, nə də “qartallar”da eyni missiyanı yerinə yetirən Qismət Alıyev bayrağı qaldırdı.

Bunun nədən qaynaqlandığını, illərdi formalaşan ənənəyə niyə əməl olunmadığını öyrənmək üçün PFL-in Mətbut və İctimaiyyətlə Əlaqələr departamentinin rəhbəri Aslan Şahgəldiyevlə əlaqə saxladıq. Qurumun rəsmisi “Football-plus.az” saytına açıqlamasında sözügedən məsələyə belə münasibət bildirdi: “Bizim stadionların bəzilərində bayraq üçün dirək var, bəzilərində isə bayraq açıq vəziyyətdə asılmış olur. Məhz bu səbəbdən qərar verdik ki, yeni mövsümün ilk turunda himn səslənsin və komandalar üzlərini bayrağa tərəf çevirsinlər. Onu da bildirim ki, “Dalğa Arena”, “Bayıl Arena” kimi bəzi stadionlarda bayraq üçün dirək nəzərdə tutulmayıb. Orda bayraq yüksəkdə daim açıq vəziyyətdə olur”.

RƏŞAD