İyulun 29-da AFFA-nın inzibati binasında PFL-in konfransı keçirilib. Tədbirdə qurumun prezidenti Ramin Musayev və premyer-liqanın 9 klubunun mümayəndələri iştirak edib.

Yalnız “Zirə”nin nümayəndəsi həmin vaxt Konfrans Liqasının 2-ci təsnifat mərhələsinin cavab oyunu üçün səfərdə olduğundan iclasa qatılmayıb. Ötən sayımızda xəbər verdiyimiz kimi, konfransda Ramin Musayevin səhhəti ilə bağlı vəzifəsindən ayrılması məsələsinə baxılıb və qəbul edilib. Daha sonra isə yeni prezident vəzifəsinə Elxan Səmədovun təyinatı gerçəkləşib.

Maraqlıdı, iclas zamanı Ramin Musayevlə klub nümayəndələri arasında nələr yaşanıb? Bu və başqa maraqlı anlardan xəbərdar olmaq üçün klub nümayəndələri ilə danışdıq.

İlqar Nadiri (“Kəpəz”in icraçı direktoru): "Konfransın ab-havası normal idi. Ramin müəllim müraciət etmişdi. Dedi ki, səhhətimlə bağlı bir müddət burda ola bilməyəcəm. Cansağlığı hər şeydən önəmli olduğuna görə uzun zamandan sonra ayrılmaq istədiyini söylədi. Görüş bu səpkidə keçdi. Klub nümayəndələrinə, "Neftçi"yə Konfrans Liqasındakı oyunlarda uğurlar arzuladı. Ramin müəllimin PFL-də uzun müddətli xidməti olub. Biz də ona təşəkkür edirik. Həmişə bizə dəstək olub. İnşallah, bundan sonra iş və şəxsi həyatında hər şey qaydasında olar".

Nail Kərimov (“Qəbələ”nin idman direktoru): "Ramin müəllim daim səmimiyyəti ilə seçilən şəxs olub. Bu tədbir də həmin tonda baş tutdu. Kiçik bir çıxış etdi. Hamı ilə sağollaşdı. Bir-birimizə uğurlar arzuladıq. Daha sonra bütün klub nümayəndələri ilə görüşdü, vidalaşdı. Və beləcə istefa verdi".

ŞAİR ABDULLA