“Atletiko” və “Udineze” arasında aparılan danışıqlar sona çatıb. İspaniya klubu udinelilərin oyunçusu Nauel Molinanı transfer edib.
“Yuventus”un da maraq dairəsində olan müdafiəçi madridlilərə 12 milyon avroya satılıb. O, əvvəlki klubunu bonus kimi daha 6 milyon avro irəli sala bilər. Ötən ilin iyununda debüt etdiyi Argentina yığması ilə Amerika Kubokunun qalibi olan 24 yaşlı Molina “Atletiko” ilə 5 illik müqavilə bağlayıb.
Manuel Sançes isə növbəti dəfə baş məşqçi Dieqo Simeoneyə lazım olmayıb. O, yeni mövsümə də Pamplonada başlayacaq. “Atletiko” oyunçusunu yenə “Osasuna”ya icarəyə verib. 21 yaşlı müdafiəçi bu komandada 3-cü dəfə icarə əsasında çıxış edəcək. Manuel son iki mövsümdə “Osasuna”da keçirdiyi 51 oyunda 1 qolun və 7 məhsuldar ötürmənin müəllifi olub.
Yeri gəlmişkən, “Atletiko” artıq yay transfer kampaniyasını başa vurub. Bunu jurnalistlərə klubun prezidenti Enrike Sereso açıqlayıb: “İdman direktorluğumuz Molinanın keçidi ilə komandanın son hissəsini tapa bildi. Jurnalistlər üçün təkrar edirəm: biz axtardığımız son hissəni tapdıq”.