Yeni mövsümün startına 9 gün qalmış AFFA premyer-liqa və ölkə kubokuna sponsor axtarışına çıxıb.

Bununla bağlı srağagün qurumun saytında xəbər yerləşdirilib:

Heç şübhəsiz, ölkə futboluna rəhbərlik edən şəxslər sponsorluqla bağlı hansısa şirkət və ya biznes qurumu ilə razılığa gəliblər ki, tender elan olunub. Əks halda AFFA heç vaxt boş yerə sözügedən elanı saytında yerləşdirməzdi. Assosiasiyanın bu addımı gözdən pərdə asmaq, ictimaiyyətə “şəffaf işləyirik” mesajı ötürməkdi. Bu gün ölkə futbolunu yaxından izləyən, baş verən proseslərdən xəbərdar olan istənilən şəxs bilir ki, “Misli” premyer-liqanın titul sponsoru olacaq.

2021-ci ildə “Azərlotereya”nı təhvil alan Türkiyənin “Dəmirörən Holdinq” şirkəti Azərbaycan bazarına yeni ayaq açanda, kuluarlarda bu şirkətin ölkə futboluna da yatırım edəcəyi söylənilirdi. Görünür, artıq tərəflər arasında razılıq əldə olunub və tenderin elan olunması da məhz bu danışıqların yekunudu. Sadəcə, indi bir suala aydınlıq gəlməyib. “Misli” təkcə premyer-liqanın titul sponsoru olacaq, yoxsa ölkə kubokunun da?

Bu suala aydınlıq gətirmək üçün PFL-in Mətbuat və İctimaiyyətlə Əlaqələr Departamentinin rəhbəri Aslan Şahgəldiyevlə əlaqə saxladıq. Amma həmsöhbətimiz bu barədə informasiyasının olmadığını, yenilik olacağı halda ictimaiyyətə məlumat veriləcəyini söylədi.

Onu da xatırladaq ki, formal olaraq keçirilən tenderin son günü kimi iyulun 29-nu müəyyənləşdirilib. Elə bu tarix də çox şeydən xəbər verir. Az qala 3 ildi AFFA və PFL premyer-liqaya, ölkə kubokuna titul sponsoru axtarışına çıxsa da, bir nəticə hasil olmayıb. Ancaq bu il cəmi 3 günə yeni sərmayədar özünü tanıtmalıdı. Sizcə, Azərbaycanda bu mümkündü?

RƏŞAD