“10 min dollarını alacaqsan, ancaq müqaviləndə 15 min dollar qeyd olunacaq ki, artıq göstərilən 5 mini mənə verəcəksən” – ŞOK AÇIQLAMA
"Xəzər Lənkəran"da oynadığım 6 ay müddətində komandanın o vaxtkı baş məşqçisi Mirça Rednik mənə rahatlıq vermirdi".
Bunu "Xəzər Lənkəran"ın sabiq futbolçusu Hristu Kiaku Rumıniya mətbuatına "Xəzər Lənkəran"da çıxış etdiyi dövrdə üzləşdiyi problem barədə danışarkən deyib. 36 yaşlı veteran yarımmüdafiəçi baş məşqçi Mirça Redniklə münasibətlərinin pis olduğunu bildirib: "Müqaviləyə imza atdıqdan sonra aldığım puldan ona və agentlərə komisyon verməli olduğumu söylədi. Təbii ki, bunu etmədim. Bakıda "Neftçi" ilə oyunumuz var idi. Rednik dedi ki, matçdan sonra danışarıq. Həmin qarşılaşmada meydana çıxdım. Növbəti oyuna 2 gün qalmış isə məni otağına çağırdı. Digər futbolçular da orda idi. Dedi ki, uşaqlar, görürsüz, Kiakunun mənə borcu var. Bir daha ona pul verməyəcəyimi izah etdim. Bildirdi ki, öz işindi, növbəti matçda oynamayacaqsan. Start heyətində Aleksandr Pitsurkaya şans vermişdi. Hamı ona gülürdü. 80-ci dəqiqədə meydana çıxdım və cəmi 3 dəqiqə sonra qol vurdum. Sonrakı oyun ərəfəsində də analoji halla üzləşdim".
Rumıniyalı vinger həmyerlisinin transferlərdən milyonlar qazandığını söyləyib: "Onların hamısı Rednikə pul verirdi. Komandaya gətirdiyi oyunçuların sayını nəzərə alsaq, baş məşqçi həmin vaxt milyonlarla dollar qaznmışdı".
Qeyd edək ki, Mirça Rednik 2010/11 mövsümündə "Xəzər Lənkəran"ın baş məşqçisi olub. Hristu Kiaku isə həmin mövsümün ikinci yarısını icarə əsasında cənub təmsilçisində keçirib.
Kiakunun səsləndirdiyi fikirlərə münasibət öyrənmək üçün vaxtilə “Xəzər Lənkəran”ın mətbuat katibi olan Hüseyn Cəbrayıloğlu ilə əlaqə saxladıq. Sabir klub rəsmisi “Football-plus.az” saytına açıqlamasında bunları söylədi: “Həmin müddətdə klubda işləməsəm də, media nümayəndəsi kimi komandanın təlim-məşq toplanışında iştirak etmişəm. Rednikin yola salınmasına səbəb bəzi futbolçuların klub rəhbərliyinə müraciəti oldu. Futbolçular rumın mütəxəssisin onların transferindən pul “tutduğunu” bildirmişdilər. Rəhbərlik bu məsələni araşdıranda, bildiyim qədər oyunçular Rednikin üzünə durmuşdular. Baş məşqçi onlardan pulu necə alırdı? Bildiyiniz kimi, o vaxt Rumıniyada futbolçuların maaşı o qədər də yüksək deyildi. Deyilənə görə, Rednik futbolçu ilə danışanda vətənində nə qədər məvacib aldığını soruşurdu. Məsələn, 5 min dollar alana “Xəzər Lənkəran”da oynamağa razı salmaq üçün 10 min dollar təklif edirmiş. Həmin oyunçu razılaşanda “10 min dollarını alacaqsan, ancaq müqaviləndə 15 min dollar qeyd olunacaq ki, artıq göstərilən 5 mini mənə verəcəksən” deyirmiş. Söylənilənlərə görə, onun iş metodu belə olub. Özünün gətirdiyi futbolçular bu gün belə danışırsa, o vaxt üzünə durublarsa, deməli, yazılanlar həqiqəti əks etdirir”.
RƏŞAD
Digər xəbərlər
