Çempionlar Liqasının 2-ci təsnifat mərhələsi çərçivəsində Kiyev ''Dinamo''sunun ''Fənərbaxça''nı qəbul edəcəyi stadionun adına aydınlıq gəlib.

Gözlənildiyi kimi, oyun Polşada keçiriləcək. İlk öncə matçın Vrotslav şəhərində keçiriləcəyi güman olunurdu. Amma belə olmayıb. Bu önəmli qarşılaşma Lodz şəhərindəki ''LKS Stadionu''nda oynanılacaq. 18029 azarkeş tutumuna malik arenada yerli LKS ev oyunlarını keçirir. Ukrayna yığması da bu ay Millətlər Liqası çərçivəsində ev oyununu məhz bu stadionda keçirmişdi. Beləliklə, ilk görüş iyulun 20-də bu məkanda oynanılacaq və Bakı vaxtı ilə saat 22.00-da başlayacaq.

''Fənərbaxça'' ilə bağlı başqa xəbərləri də diqqətinizə çatdıraq. Əsas komandadan ayrı qalmaq məcburiyyətində qalan, Almaniyaya bacısının toyuna yollanan və sosial şəbəkədə ''Fənərbaxça''nı təqibdən çıxaran Məsut Özil susqunluğu pozub. Bütün bu olaylardan sonra Türkiyə mətbuatında onun sabiq klubu ''Verder''ə qayıdacağı ilə bağlı xəbərlər yayılmışdı. Amma təcrübəli futbolçu öz səhifəsində yeni bir açıqlama verib. O, Türkiyəyə tətilə gəlmədiyini, fərdi məşqlərini davam etdirdiyini və uşaqlıq sevgisi olan ''Fənərbaxça''ya dönməyi səbirsizliklə gözlədiyini bildirib. Özil ''Fənərbaxça'' ilə hədəflərinə çatmadan karyerasını bitirməyəcəyini vurğulayıb və fanatlardan yalan xəbərlərə inanmamağı xaiş edib. Ən əsası 33 yaşlı futbolçu sosial şəbəkələrdə yenidən ''Fənər''in rəsmi səhifəsini follow edib, yəni izləməyə başlayıb.

Transfer xəbərlərinə gəlincə, İstanbul nəhəngi ''Konyaspor''un mərkəz müdafiəçisi Əbdülkərim Bardakçı uğrunda mübarizədən qalib ayrılıb. Ötən mövsüm müdafiədəki inamlı oyunu ilə yanaşı 5 qol, 3 məhsuldar ötürməlik performansı ilə də diqqət çəkməyi bacaran 27 yaşlı bu futbolçu ''Qalatasaray''la ''Beşiktaş''ın da maraq dairəsində idi. Amma Əli Koçla onun ''Konyaspor''dakı həmkarı Fatih Özgökçən arasında anlaşma əldə olunub.

''Sarı-lacivərdlilər''in bu transferə görə 2,6 milyon avro (bəzi mənbələrdə 3,3 milyon avro qeyd olunub) ziyana düşəcəyi vurğulanır. Bundan başqa, ''Zenit''dən ayrılan və azad agent statusuna malik tanınmış rusiyalı forvard Artyom Dzyubanın da ''Fənərbaxça'' ilə anlaşdığı irəli sürülüb. Bu xəbəri Rusiyanın ''Matç TV'' kanalı yayıb. Xəbərdə qeyd olunur ki, Dzyuba illik 2,5 milyon avro məvacib və üstəlik imza parası alacaq. Amma ''Fənər''in rəsmisi Səlahəttin Baki Rusiyanın ''championat.com'' saytına verdiyi açıqlamada Dzyuba ilə bağlı yayılan xəbərləri təkzib edib.

Sonda qeyd edək ki, “Fənərbaxça” dünən Jorje jezuşun dönəmində ilk yoxlama oyununu keçirib. Komanda doğma “Can Bartu” bazasının meydançasında Şimali Makedoniyanın son şempionu “Şkupi” ilə qarşılaşıb. Görüş 1:1 hesabı ilə başa çatıb.