“Fənərbaxça”nın sabiq üzvündən Ərsun Yanalla bağlı şok sözlər
Hazırda Fransa təmsilçisi ''Trua''nın şərəfini qoruyan Mərakeş əsilli fransalı Adil Rami qatıldığı bir verilişdə ''Fənərbaxça''da oynadığı dönəmlə bağlı şok ifadələr işlədib.
Football-plus.az xəbər verir ki, müdafiəçi İstanbul təmsilçisinə 2019-un yayında gəlmişdi. Həmin vaxt baş məşqçi Ərsun Yanal idi. Təcrübəli müdafiəçi mövsüm ərzində 1-i superliqa, 6-sı ölkə kuboku çərçivəsində olmaqla cəmi 7 rəsmi oyun keçirmiş və 2020-nin yayında komandanı tərk etmişdi. Yanalın onu bilərəkdən oynatmadığına işarə vuran 36 yaşlı futbolçu bunları deyib:
''Baş məşqçi mənə heç cür şans vermək istəmirdi. Mən isə yalnız gözləyirdim. Sonra müdafiəçilər bir-bir zədələnməyə başladı. Mən komandada üçüncü mərkəz müdafiəçisi sayılırdım. Düşündüm ki, artıq mənim zamanım yetişib. Amma məşqçi bu dəfə ''6'' nömrə mövqeyində oynayan dayaq yarımmüdafiəçisini müdafiənin mərkəzində oynatmağa başladı. Bunun nə üçün baş verdiyini anlamağa çalışaraq məşqlərimi davam etdirirdim. Matçların birində komandanın əsas müdafiəçisi ehtiyatda qaldı və mənim yanımda əyləşdi. Çünki əvvəlki oyunda zəif oynamışdı və fanatlar onu fitə basmışdı. 3:1 və ya 4:1 hesabı ilə öndə olduğumuz matçın 75-80-ci dəqiqəsində məşqçi həmin müdafiəçini meydana buraxdı. Öz-özümə düşündüm ki, hesabda öndə olan komandada müdafiəçi niyə oyuna daxil olur? Sonra bir gün türkiyəli menecer mənə yeni klub axtararkən aramızda maraqlı bir dialoq yaşandı və hər şeyin üstü açıldı. O mənə ''Fənərbaxça''da nə üçün oynadılmadığımı izah edərkən ''çünki menecerin sənin öz bacındı. Yəni əcnəbi bir şəxsdi. Burda oynamaq üçün türkiyəli menecerin olmalıdı'' dedi. Bu işlərin necə təşkil olduğunu bilmədiyim üçün bunun səbəbini soruşdum. Məndən müqaviləmdə müəyyən sayda oyunlara çıxacağım təqdirdə 200, 300 və 500 min avroluq bonusların olub-olmadığını soruşdu. Mən də ''bəli var'' dedim. ''Buna görə də oynamayacaqsan'' dedi. Bu söhbət mənə hələ də çatmadığı üçün yenə səbəbini soruşdum və hər şeyi bu sözlərlə izah etdi: ''türk menecer ilə çalışanda həmin menecer mükafatın bir hissəsini baş məşqçi ilə bölür. Məşqçi də buna görə səni oynatmağa başlayır''. Açığı həmin söhbətdən sonra karyeramı bitirmək barədə də düşündüm''.
''Fənərbaxça''dan söz düşmüşkən bir xəbəri də diqqətinizə çatdıraq. İstanbul nəhəngi Jorje Jezuşun planlarına daxil olmayan oyunçularla yollarını ayırmaqda davam edir. Bu dəfə komandadan ayrılan Luis Qustavo oldu. Təcrübəli braziliyalı yarımmüdafiəçinin birillik müqaviləsi olmasına rəğmən onunla yollar qarşılıqlı şəkildə ayrıldı. Qustavo Səudiyyə Ərəbistanı təmsilçisi ''Əl-Nəsr''lə ''1+1'' illik müqavilə imzalayıb. Qeyd edək ki, 35 yaşlı futbolçu ''Fənər''ə 2019-un yayında 6 milyon avro qarşılığında ''Marsel''dən transfer olunmuşdu. O, bonuslarla birlikdə illik 4 milyon avroya yaxın pul qazandığından fanatlar bu futbolçudan çox şey gözləyirdi. Amma Qustavo ümidləri doğrulda bilmədi. 3 mövsüm ərzində 97 oyuna çıxan və 5 qol vuran ''sambaçı'' İstanbulu titulsuz tərk etdi. Komandanı tərk edəcək digər oyunçunun Dimitrios Pelkas olacağı gözlənilir. Yunan vingerə ''Hall Siti'' ciddi maraq göstərir. Bundan başqa yeni transferlərdən olan 19 yaşlı forvard Tyaqo Çukurun təcrübə toplaması üçün başqa kluba icarəyə verilməsi də gündəmdədi.
ƏLİ
Digər xəbərlər
