Xavi Ernandesin problemi həllini tapıb: “Barselona”nın baş məşqçisi komandasının ABŞ-dakı düşərgəsinə qoşulub.
O, ciddi səbəbə görə Amerikaya yollana bilmirdi. Buna onun vaxtilə üç dəfə İranda olması rəvac vermişdi. Sabiq yarımmüdafiəçi cənub qonşumuza karyerasının qürub çağını keçirdiyi “Əl-Sədd”in oyunçusu kimi səfər etmişdi. ABŞ-la İran arasındakı münasibətlər gərgin olduğu üçün Amerika dövlətinin müvafiq orqanları İranda olmuş xarici ölkə vətəndaşlarına bu ölkəyə hansı məqsədlərlə getdiyini araşdırandan sonra viza verir. Məlum səbəbdən 42 yaşlı mütəxəssis İspaniyadan Amerikaya uçan təyyarəyə buraxılmamışdı. Qeyd edək ki, rəsmi məlumata görə, xarici pasportunda İran möhürü olan şəxslər ABŞ ərazisinə giriş zamanı zəruri prosedurdan keçməlidilər.
“Barselona” viza problemi üzündən yerli “İnter Mayami” ilə yoldaşlıq matçını (6:0) baş məşqçisiz keçirmişdi. Sınaq oyununda Xavinin səlahiyyətlərini qardaşı olan köməkçisi Oskar Ernandes yerinə yetirmişdi. Artıq problem yoluna qoyulub və baş məşqçi “Barselona” ilə Las Veqasa yollanmaq şansı qazanıb. Xavinin komandası iyunun 24-də bu şəhərdə əzəli rəqib “Real”la, 26-da Dallasda “Yuventus”la, ayın 31-də isə Nyu Yorkda “Nyu York Red Bullz” ilə qarşılaşacaq.