Mövsümlərarası fasilədə “Sabah” heyətini yetərincə gücləndirsə də, ilk yoxlama görüşündə “Sumqayıt”a məğlub oldu.

Ancaq bu yenilgi “tələbələr”in baş məşqçisi Murad Musayevi o qədər üzməmişdi. Rusiyalı mütəxəssis “Football-plus.az” saytına müsahibəsində hazırlıq prosesində nəticənin önəmli olmadığını vurğulamaqla yanaşı, bizi maraqlandıran başqa suallara da cavab verdi.

- Matçla bağlı fikirlərinizi bilmək istərdik.
- Birinci oyunda istədiklərimizin heç də hamısı alınmır. Çox sayda səhvlərə yol verdik. Hesabı nəzərə almasaq, sevindiricidi ki, ilk görüşü zədəsiz başa vurduq. Adi yoxlama oyunu idi.

- Bu oyuna qədər 4 transfer reallaşdırmısız. Qarşıdakı günlərdə komandaya yeni qoşulanlar olacaq?
- Fikrimcə, daha 3 transferimiz olacaq. Birinin adı artıq sabah (bu gün) ictimaiyyətə açıqlanacaq. Fikrimcə, Bolqarıstana gedənə qədər daha bir futbolçu ilə müqavilə bağlayacağıq. Ümid edirəm ki, Bolqarıstan toplanışında daha bir oyunçu sıralarımıza qoşulacaq.

- Son vaxtlar Vaqner Lavın adı “Sabah”la yanaşı hallanır. Onun transferi nə dərəcədə realdı?
- Onun bizə qoşulacağı ehtimalı o qədər də böyük deyil. Biz onunla danışıqlar apardıq. Ancaq ortaq məxrəcə gələ bilmədik.

- “Sabah”ın əvəzedici heyəti fəaliyyətini dayandırdı. Sizcə, rəhbərliyin bu addımı nə dərəcədə doğrudu? Əsas komandanın baş məşqçisi olaraq, qərar verilməmişdən öncə sizinlə məsləhətləşdilər?
- Əlbəttə ki, əvəzedici komanda klubun əsas hissəsidi. Əsas komandanın baş məşqçisi kimi “ikincilər”in olması mənim üçün də yaxşı idi. Ordan futbolçu götürərdim, futbolçular orda oyun təcrübəsi qazanardılar. Elə alındı ki, əvəzedicilərin əksər oyunçularına premyer-liqa klublarından təklif var idi. U-19 isə öz çempionatında çıxış edir. Premyer-liqada oynaya biləcək futbolçunu divizionda saxlamaq düzgün olmazdı. Bu bizim üçün çətin qərar idi, ancaq bir mövsüm üçün nəzərdə tutulub. Uşaqların hamısı başqa klublara icarəyə yollanıblar. İkinci komanda olsun deyə küçədən kimisə tutub gətirmək də düzgün deyil. Əvəzedici komanda “Sabah”ın strukturunda mütləq olacaq. Bu addım atıldı ki, gənclərimiz daha da inkişaf etsin.

- “Sabah” geniş heyətə malikdi. Zədədən dönən, əsas heyətə düşə bilməyənlər harda oyun təcrübəsi qazanacaq?
- İkinci komanda yoxdusa, deməli, ümid qalır əsas komandaya. Özünüz də gördüz ki. bu gün bizdə oyunçu çatışmazlığı var. “Sumqayıt”la oyuna yeniyetmələri də dəvət etmişdik. Heyətə çox futbolçu dəvət etməmişik ki, onlar oyun təcrübəsi baxımından əziyyət çəksinlər. Ümid edirəm ki, zədəlilərimiz də çox olmayacaq.
- Kaşukun taleyinə aydınlıq gəldi? Ukraynalı forvard karyerasını harda davam etdirəcək?
- Kaşuk “Şaxtyor”a dönüb. Onlarda toplanış hələ yeni başlayır. Donetsk klubunun rəhbərliyinin qərarından çox şey asılıdı. Legionerlərin çoxu “Şaxtyor”u tərk etdiyindən, məncə, komandanın ona ehtiyacı yaranıb. Səhv etmirəmsə, Donetsk təmsilçisinin təlim-məşq toplanışı iyulun 25-də başa çatır. Fikrimcə, həmin tarixdə bütün suallara aydınlıq gələcək.

- Yeni mövsümdə komandanın qarşısına hansı məqsəd qoyulub?
- İlk növbədə bunu rəhbərlik deməlidi. İkincisi, transferləri yekunlaşdırmalıyıq. Bəli, danışıq apardıqlarımız olub və yenə də var. Ancaq bəzən elə olur ki, danışıqlar yarımçıq qalır. Heç də hamı Azərbaycana gəlmək istəmir. Bu üzdən heyətin komplektləşdirilməsi başa çatmalıdı. Ancaq o dəqiqdi ki, hamımızın – məşqçilərin, futbolçuların məqsədi bir addım irəli getmək, ötən illə müqayisədə daha bir pillə yüksəkdə yer almaqdı. Özümüz üçün ən yüksək hədəfləri müəyyənləşdirmişik və çalışacağıq meydana çıxdığımız hər matçı qələbə ilə başa vuraq.

RƏŞAD