Hakimlər Komitəsinin rəhbəri Frits Stuxlikin müqaviləsinin müddəti bu gün başa çatdığına görə postundan gedəcəyini bir neçə gün öncə xəbər vermişdik.

4 il əvvəl UEFA-nın tövsiyəsi ilə Azərbaycana gələn avstriyalı funkisonerin bundan sonra harda çalışacağı öz işidi. Bizi maraqlandıran onun boş qoyduğu kresloya kimin əyləşəcəyidi.

Məsələ ilə bağlı “Futbol+” qəzetinə açıqlama verən AFFA-nın baş katibi Sərxan Hacıyev komitənin yeni sədrinin adının İcraiyyə Komitəsinin növbəti iclasında müəyyənləşəcəyini bildirib. Görəsən, boş qalan posta namizədlər var?

Bu sualla müraciət etdiyimiz Veteranlar İttifaqının sədri, beynəlxalq dərəcəli hakim Rüstəm Rəhimov “Football-plus.az” saytına açıqlamasında bunları söylədi:

“Açığı, bu məsələ barədə ətraflı bilgim yoxdu. Eşitdiyimə görə, Stuxlikin boş qoyduğu posta əcnəbi də təyin oluna bilər, yerli də. Şanslar 50-nin 50-yədi. Ancaq məndən olsa, Hakimlər Komitəsinə yerli kadr təyin edərdim. Özümüzünkülərin arasında bu işi layiqincə yerinə yetirə biləcək təcrübəli funksionerlər var. Konkret ad çəkmək istəmirəm. Bizim kimi təcrübəli insanlar da müəyyən məsələlərdə onlara yardımçı olarıq”.

RƏŞAD