Çalhanoğlu sözlərinə görə cəzalanacaq?
Hakan Çalhanoğlu Türkiyədə verdiyi son müsahibə zamanı ''İnter''in baş məşqçisi Simone İnzaqi ilə bağlı dediyi sözlərə görə cəza ala bilər.
Bu xəbəri İtaliyanın ''Corriere dello Sport'' nəşri yayıb. Qəzetin məlumatına görə təcrübəli futbolçunun sözləri klub rəhbərliyini qəzəbləndirib. Hakan bir neçə gün öncə ''Tivibuspor'' kanalına verdiyi geniş müsahibədə öz məşqçisini bu sözlərlə tənqid etmişdi:
''Ötən mövsüm ikinci dövrədəki Milan derbisində baş məşqçimizin əvəzetmələri üzündən uduzduq. Hesabda öndə idik və 75-ci dəqiqədə məni, Perişiçi, Barellanı əvəzlədi. Bundan sonra oyunun gedişatı dəyişdi və 2 qol buraxıb məğlub olduq. Fikrimcə, məşqçinin o andakı əvəzetmələri yanlış idi. Bunu onun özünə də söylədim. Bir neçə gündən sonra kubokda ''Milan''ı 3:0 hesabı ilə darmadağın edərək qısasımızı aldıq''.
28 yaşlı futbolçu sözlərinin futbol ictimaiyyətində böyük ajiotaj doğurduğunu nəzərə alaraq yeni açıqlama verməli oldu. O, sözlərinin yanlış anlaşıldığını bildirərək İnzaqinin mükəmməl baş məşqçi olduğunu vurğuladı və ''İnter'' gəlməsində böyük rol oynadığını əlavə etdi.
Digər xəbərlər
