“Putin başımıza bombalar tökməkdən vaz keçsə...”
Məlum olduğu kimi, ''Fənərbaxça'' Çempionlar Liqasının 2-ci təsnifat mərhələsində Kiyev ''Dinamo''su ilə qarşılaşacaq.
İlk oyun iyulun 19-da Polşada keçiriləcək. Rusiya Kiyev də daxil olmaqla Ukraynanın bir çox şəhərinə fevralın sonlarından bəri hərbi təcavüz həyata keçirdiyindən ''Dinamo'' başqa ölkədə oynamaq məcburiyyətindədi. Qeyd edək ki, ötən mövsüm Ukrayna çempionatı yarımçıq dayandırıldı və 18-ci turdan sonra olan turnir cədvəli yekun nəticə kimi qəbul olundu. Bu üzdən 2-ci pilləni tutan ''Dinamo'' ÇL-in 2-ci təsnifat mərhələsinə vəsiqə qazanaraq ''Fənərbaxça''ya rəqib oldu. Kiyevlilerin 2022-ci ildə heç bir rəsmi oyun keçirmədiyini xatırladaq!
Bu arada Türkiyə futbolunu yaxından tanıyan ''Dinamo''nun baş məşqçisi Mirça Luçesku qonşu ölkədən olan həmkarlarımıza açıqlamalar verib. Müxtəlif dönəmlərdə ''Qalatasaray'', ''Beşiktaş'' və Türkiyə yığmasını çalışdırmış 76 yaşlı rumıniyalı mütəxəssis bunları deyib:
''Dinamo'' üçün ÇL kimi turnirdə yer almaq müharibədən boğaza yığılan ukraynalıların əhval-ruhiyyəsini qaldırmaq baxımından çox önəmlidi. Həyatın davam etdiyini, bombardmana rəğmən, futbola ara vermədiyimizi göstərmək istəyirik. Ukrayna xalqı 4 aydı böyük bir məyusluq içindədi. İnsanlar pərişan vəziyyətdədi. Biz də futbolla onların üzünü güldürmək, acılarını müvəqqəti də olsa, unutdurmaq istəyirik. Bizim üçün həddən artıq çətin oyunlar olacaq. Açığı, bu mərhələdə ''Fənərbaxça'' ilə qarşılaşmaq istəməzdim. Məncə, bu, 2-ci mərhələnin ən önəmli dueli olacaq. Hazırda komanda ilə birlikdə Kiyevdəyəm. Burda 5 günlük hazırlıq proqramımız nəzərdə tutulub. Oyunçular yığmanın düşərgəsindən yeni qayıdıb. Təbii ki, bütün fikirləri müharibədədi və psixoloji cəhətdən yaxşı vəziyyətdə deyillər. Savaş üzündən komandadan ayrılanlar oldu. Amma yeni gənc oyuncularımız var. Onlara da şans verəcəm. Kiyevdə hazırlığı başa vurandan sonra İsveçrəyə yollanıb orda toplanış keçəcəyik. Ev oyunumuzu harda keçirəcəyik? Böyük ehtimalla Polşada oynayacağıq. Hərçənd Putin başımıza bombalar tökməkdən vaz keçsə, ''Fənərbaxça''nı Kiyevdə də qəbul edə bilərik. Müharibənin başa çatması və yenidən fanatlarla dolu bir stadionda ev oyunumuzu keçirmək ən böyük arzumdu''.
Digər xəbərlər
