Konfrans Liqasında çıxış edəcək “Neftçi”də qaranlıq məqamlar çoxdu.

Heyətin necə formalaşdırılacağı da düşüncüdürücü məsələlərdəndi. Redaksiyamıza bəzi futbolçularla bağlı məlumatlar daxil olub.

Yerlilərdən başlayaq. “Şamaxı”da çıxış edən Rəhman Hacıyev böyük ehtimalla “Neftçi”yə qayıdacaq. İcarədə olan futbolçunu rəhbərlik geri qaytarır. Yarımmüdafiəçi hazırda komanda ilə birgə məşq edir. Flaqmanın növbəti mövsüm iddialı olmasını planlaşdıran rəhbərlik səviyyəli yerli futbolçuların sayını artırmaq niyyətindədi. Klub idarəçiləri bu səbəbdən də Rəhmanı yeni baş məşqçinin sərəncamına verəcək.

Bildiyiniz kimi, “Şamaxı”da “Neftçi”nin daha bir futbolçusu çıxış edirdi. Söhbət icarədə olan Fəhmin Muradbəylidən gedir. Yarımmüdafiəçi bölgə təmsilçisində özünü doğrulda bilmədi. Hazırda məşqlərdə iştirak edən futbolçu yenidən icarəyə göndəriləcək. Hər halda, Fəhminlə bağlı düşünülən ilkin versiya budu. Ola bilər ki, Reqekampf onu sərəncamında görmək istəsin, amma bu o qədər də inandırıcı deyil.

İndi isə keçək əcnəbilərə. Bəzi legionerlər artıq sıraya dönüb, hazırda klubla müqaviləsi olanların belə anlaşmanı qarşılıqlı şəkildə pozub ayrılması gündəmdədi. Klub rəhbərliyi müdafiənin əsas dayağı sayılan Mamadu Mboc və Voislav Stankoviçlə yola davam etmək niyyətindədi. Artıq onlarla ilkin razılıq əldə olunub. Hər iki müdafiəçiylə daha birillik müqavilə bağlanacaq. İvan Brkiç, Yusuf Laval, Sezar Meza Kolli və Gilyerme Patonun komandada qalacağını da güman etmək olar. Adı çəkilənlərin flaqmanla müqavilələri var. Klub rəhbərliyi onların ötən mövsümdəki çıxışından razı qalıb. Hərçənd Patonun çıxışı o qədər qənaətbəxş sayılmasa da, braziliyalı vingerin yeni mövsümdə özünü yaxşı tərəfdən göstərəcəyinə ümid var. Yeni baş məşqçinin yarımmüdafiəçinin performansını yüksəltməsinə kömək olacağı düşünülür.

“Neftçi” üçün düyün nöqtəsi Azər Əliyevdi. Burda ən böyük yük Zaur Əzizovun üzərinə düşür. İdman direktoru onun “milliləşləşdirilməsini” həll etməlidi. Klub rəhbərliyi bu məsələnin qısa zamanda həll olunmasını istəyib. Bu baş versə də, verməsə də, Azər komandada qalacaq. Premyer-liqada legioner limitinin artırılması da “Neftçi”nin bu məsələdə rahatlaşmasına səbəb olub. Vingerin yeni mövsümdə flaqmanın əsas üzvlərindən birinə çevrilməsi gözlənilir.

Təbii ki, komanda güclənəcək. Konfrans Liqasının 2-ci təsnifat mərhələsində “Aris”lə ilk oyuna kimi minimum 4 legionerin alınması nəzərdə tutulub ki, artıq danışıqlar yekunlaşmaq üzrədi. Mərkəz müdafiəçisi, yarımmüdafiə və hücum mövqeyinə transferlər nəzərdə tutulub. Hər zona üçün yeni məşqçinin istəyinə uyğun transfer ediləcək. Komanda Konfrans Liqasında irəliləsə, daha 2 futbolçu heyətə cəlb olunacaq.

İLKİN SULTANLI