“Barsa”ya keçəndən sonra mənə münasibət dəyişdi”
Ötən yay 2 milyon avro və bonuslar qarşılığında ''Kayserispor''dan ''Barselona''ya transfer olunan Əmrə Dəmir Türkiyə mətbuatına diqqətçəkən açıqlamalar verib.
Qeyd edək ki, Kataloniya nəhəngi 2004-cü il təvəllüdlü bu istedadlı oyunçu ilə 2027-ci ilə qədər müqavilə imzaladıqdan və 400 milyon avroluq bir təzminat maddəsi qoydurduqdan sonra onu təcrübə toplaması üçün birilliyə ''Kayserispor''un özünə icarəyə vermişdi. Amma 18 yaşlı futbolçu geridə qoyduğumuz mövsüm cəmi 7 rəsmi oyunda forma geydi. Əmrə İspaniyaya nə vaxt yollanacağına açıqlıq gətirərək Kayseri təmsilçisindən gileylənib: ''Mövsümboyu məşqlərimi davam etdirdim. ''Barsa''da işimin asan olmayacağını bildiyim üçün ora yaxşı formada yollanmaq və uzun illər oynamaq istəyirəm. Məni ora iyulun 11-nə çağırıblar. Amma bir qədər erkən yollanacam. Həm oralar[spoiler][/spoiler]ı görüb tanımaq, həm də uyğunlaşmaq üçün. ''Barselona''da oynamaq uşaqlıqdan bəri ən böyük arzumdu. Heç bir oyunlarını qaçırmıram. Təbii ki, örnək aldığım oyunçu Lionel Messi idi. Bu üzdən onun ayrılması xəbəri məni çox üzdü. Onunla birlikdə oynamağı çox istəyirdim. İnşallah, ''Barsa''da bir gün ''10 nömrə'' mənə qismət olar. ''Barselona'' rəsmiləri mənim bu mövsüm oynamağımı və təcrübə qazanmağımı istəyirdilər. Amma kataloniyalılarla müqavilə imzaladıqdan sonra sanki burda mənə münasibət dəyişdi. Klub içində bunu hiss etməyə başladım. Nə üçün mənə şans verilmədiyini anlamadım. Bunun səbəbini də heç kim mənə izah etmədi. Halbuki mən oynamaq üçün dəridən-qabıqdan çıxırdım. Hər həftə oynamağa hazır idim. Amma mənə bu şansı vermək istəmədilər. Bildiyimə görə, hətta müqavilədəki maddəyə əsasən müəyyən sayda oyun keçirəcəyim halda ''Kayserispor'' bonus qazanacaqdı. Buna rəğmən yenə də qəribə şəkildə mənə şans verilmədi''.
Qeyd edək ki, 2019-cu il noyabrın 9-da - 15 yaş 9 ay 25 günlüyündə ''Gənclərbirliyi''nin qapısına yol tapan Əmrə Dəmir Türkiyə çempionatı tarixində qol vuran ən gənc futbolçu statusundadı.
Digər xəbərlər
