Aslan Kərimov: “Heç bir problemi olmadığı halda "23-lüy"ə düşməyibsə...” - AÇIQLAMA
Yığmamız Millətlər Liqası çərçivəsində Belarusla qarşılaşdı.
"Football-plus.az" xəbər verir ki, oyundan öncə baş məşqçi Canni de Byazinin açıqladığı "23-lük"də yer alan futbolçuların adı diqqətimizi çəkdi. Bu dəfə Bədavi Hüseynov, Anton Krivotsyuk və Toral Bayramov kənarda qaldı. Antonun adı Qazaxıstanla qarşılaşmanın da iştirak ərizəsinə salınmamışdı. Onunla yanaşı, Abbas Hüseynovla Coşqun Diniyev də şans qazanmamışdı.
Qazaxlarla oyunda Bədavi Hüseynov zəif çıxışla diqqəti çəkdiyindən onun kənarda qalmasını başa düşmək olar. Polşa çempionatının son görüşlərində “Visla”nın heyətinə düşməkdə çətinlik çəkən Antonun da ofsaydda qalmasında qeyri-adi heç nə yoxdu. Amma "Qarabağ"ın əsas heyət oyunçularından olan Toral Bayramovun "23-lüy"ə düşə bilməməsi təəccüb və təəssüf doğurur.
Bu məsələ ilə bağlı millimizin sabiq kapitanı Aslan Kərimovun reaksiyasını öyrəndik:"Milli komandanın düşərgəsində olmadığımdan və hazırlı prosesini izləmədiyimdən "23-lüy"ə düşə bilməyən futbolçular haqda qəti nəsə söyləmək düzgün deyil. Çünki məşq prosesi zamanı futbolçularda mikrozədə baş verir, heç də hamıda mənəvi-psixoloji vəziyyət yaxşı olmur. Seçmə mərhələ çərçivəsində ilk oyunlarda şans qazanan futbolçular özünü yaxşı tərəfdən göstərə bilməyəndə kənarda qalır. Həmçinin rəqib komandanın gücünə uyğun baş məşqçinin seçdiyi taktikaya hansısa futbolçular uyğunlaşmadığına görə kənarda qalır. Toral Bayramov "Qarabağ"ın aparıcı oyunçusudu. İstər çempionat, istərsə də avrokubok oyunlarında özünü yaxşı tərəfdən göstərib. Yaxşı sürətə və texnikaya malikdi. Cinahdan təhlükəli reydlərlə diqqəti çəkir. Belarus yığması ilə, demək olar ki, bərabər səviyyəli komandayıq. Onlarla oyunda cinahlardaToral kimi futbolçuya çox ehtiyac var idi. Yuxarıda qeyd etdiyim səbəblər üzündən kənarda qalıbsa, burda şişirdiləcək durum yoxdu. Futbolçunun heç bir problemi olmadığı halda "23-lüy"ə düşməyibsə, bu böyük şübhə doğurur. Amma yenə də baş məşqçinin seçimidi, yəqin bildiyi nəsə var".
ABDULLA İSMAYILOĞU
Digər xəbərlər
