Azərbaycanda futbol mövsümü bitdi və klublar istirahətə çəkildi.

Təbii ki, avrokuboklarda mübarizə aparacaq klublar üçün fasilə uzun çəkməyəcək. Çünki ayyarım sonra Avropa turnirləri start götürəcək. Hamıya bəllidi ki, “Qarabağ” ölkəmizi Çempionlar Liqasında, “Neftçi”, “Zirə” və “Qəbələ” isə Konfrans Liqasında təmsil edəcək. Ağdamlılar Avropanın əsas turnirində mübarizəyə 1-ci, digər klublarımız isə mahiyyətcə 3-cü yarışda 2-ci təsnifat mərhələsindən başlayacaq. Bəribaşdan xatırladaq ki, qitə kuboklarının püşkü iyunun 14-15-də atılacaq.

ÇL-də 1-ci təsnifat mərhələsinin il oyunları iyulun 5-6-da, cavab görüşləri isə 12-13-də keçiriləcək. KL-də 2-ci təsnifat mərhələsinin ilk oyunları iyulun 21-də, cavab görüşləri 28-də keçiriləcək.

Ölkə klublarından üçünün hazırlıq planları bəllidi. Yalnız “Neftçi”də heçnə bilinmir. Xatırladaq ki, paytaxt klubunun Müşahidə Şurasının iyunun 2-də keçiriləcək iclasından sonra planlar dəqiqləşəcək.

"Qarabağ"ın hazırlıq planı bəllidi. Klubun meneceri Asif Əsgərov bu haqda yerli mediaya açıqlama verib:“İyunun 14-də Çempionlar Liqasının püşkatma mərasimi keçiriləcək. 20-də isə Avstriyaya yollanmağı planlaşdırırıq. Təbii ki, üz-üzə gələcəyimiz sınaqçı-rəqiblərin adları və keçiriləcək yoxlama görüşlərinin sayı hələ bəlli deyil. Ancaq orada neçə gün qalmağımız ÇL-də ilk matçı harada keçirəcəyimizdən asılıdı. İlk oyuna Bakıda çıxmalı olsaq, komanda iyunun 30-da Azərbaycana qayıdacaq. Ancaq ilk qarşılaşmanı Avstriyaya yaxın ölkələrin birində keçirsək, qalıb matça hazırlaşacağıq".
“Zirə”təlim-məşq toplanışı üçün Türkiyəni seçib. Qardaş ölkədə yoxlama oyunlarının keçirilməsi də nəzərdə tutulub. Amma hələ ki rəqiblərin adına aydınlıq gəlməyib.

“Qəbələ”də isə vəziyyət fərqlidi. Komanda Konfrans Liqasına əvvəlcə doğma şəhərdəhazırlaşacaq. Növbəti məkanın hara olacağı isə büdcədən asılı olacaq. Redaksiyamıza daxil olan məlumata görə, “qırmızı-qaralar” da “Zirə” kimi Türkiyəyə yollanacaq.

İLKİN SULTANLI