“Zirə”nin baş məşqçisi Rəşad Sadıqov ADBTİA-nın tələbələri ilə görüşüb.

Mayın 19-da baş tutan görüşdə təhsil ocağının idman işləri üzrə prorektoru, yunan-Roma güləşi üzrə olimpiya çempionu Fərid Mansurov millinin və “Qarabağ”ın sabiq kapitanına təşəkkürnamə və üzərində gənc mütəxəssisin şəkli olan forma hədiyyə edib. Tələbələrin qarşısında çıxış edən Sadıqov müxtəlif mövzulara toxunub:

“Öyrənmək həmişə vacibdi. Mən də ADBTİA-nı bitirmişəm. Həmişə müəllimlərim mənə öyrənməyi deyirdilər. Hazırda məşqçi olsam da, bir növ tələbə sayılıram. Çünki indi də öyrənirəm... Azərbaycanda istedadlı futbolçular var. Ancaq onlardan düzgün yararlanmaq, öyrətmək, düzgün məşq prosesi keçmək lazımdı. Siz də gələcəkdə məşqçi-müəllim olacaqsız. Çalışın ki, əlinizin altında olan “material”dan düzgün yararlanasız... Karyeramda basketbol oynamağım səhv addım idi. Düşünürəm ki, peşəkar futbolçu kimi bunu etməməliydim. Həmin vaxt “transfer pəncərəsi” bağlandığına və “Neftçi”nin heyətində oynaya bilməyəcəyimə görə bu addımı atmalı olmuşdum... “Qarabağ”a qədər futbol karyeramın uğurlu olduğunu demək olmaz. Adam bəzən futbolçu olduğunu dilə gətirmək istəmirdi. Böyükhesablı məğlubiyyətlər olurdu. Düzdü, o məğlubiyyətlərdən az dərs çıxarmamışam... Desəm ki, cərimə zərbələri üzərində xüsusi işləyirdim, yalan demiş olaram. Bəzən olub ki, cərimə zərbəsi vurmaq istəməmişəm, məşqçi deyib ki, vur. Vurmuşam, təsadüfən qol olub. “Rusenborq”a vurduğum qolda küləyin rolu az olmayıb. “Slovan”a da cərimə zərbəsindən vurduğum qol üzərində xüsusi işləməmişdim. Amma Türkiyə millisinə vurduğum qol düşünülmüş, üzərində işlədiyimiz qol idi”.