"Sabah"ın əməkdaşı "Qarabağ" azarkeşləri ilə yaşadığı problemdən danışdı - AÇIQLAMA
Dünən AFFA İntizam Komitəsinin iclası keçirilib. Toplantıda diqqətçəkən qərarlardan biri premyer-liqanın 25-ci turunda baş tutan “Qarabağ” – “Sabah” (1:1) oyunu ilə bağlıdı. Belə ki, Ağdam təmsilçisinin azarkeşləri “Sabah”ın rəsmisi Dadaş Zeynalova fiziki təsir göstərdiyi üçün meydan sahibi klub 4000 manat cərimələnib.
Adı çəkilən şəxs “tələbələr”in operatorudu. Uzun illərdi futbol sahəsində olan Dadaş işinin peşəkarıdı. Müharibə veteranı olan Zeynalovla məsələ ilə bağlı əlaqə saxladıq. O, başverənlərlə haqda bunları söylədi:
“Əvvəlcə “Qarabağ”ı çempionluq münasibəti ilə təbrik edirəm. Mənim “Qarabağ” camiəsinə böyük hörmətim var. Qurban Qurbanov ölkənin ən güclü məşqçisidi, adını tarixə yazdırıb. Gündüz Abbaszadə ilə uzun illər bir yerdə çalışmışıq. Qara Qarayev qardaşımdı. Onunla gözəl münasibətimiz var. Özüm də qarabağlıyam, müharibə veteranıyam. İstəməzdim ki, belə şeylər olsun. Hər iki tərəf öz səhvini anladı. Polisə izahatımda da bunları yazdım. İstəməzdim ki, bu məsələ “Qarabağ”ın çempionluğuna kölgə salsın. Başverənlərlə bağlı danışmaq istəmirəm. Hər şey həll olundu. Qarşı tərəf də səhvini anlayıb, üzrxahlıq etdi. Bir daha qeyd edim ki, adını çəkdiyim şəxslərə böyük hörmət var. Onları çempionluq münasibəti ilə səmimi qəlbdən təbrik edirəm”.
İLKİN SULTANLI
