"Kəpəz"də dopinq problemi - ÖZƏL AÇIQLAMA
Dünən keçirilən AFFA İntizam Komitəsinin iclasında 1-ci divizionun son turunun oyunlarında baş verən qayda pozuntuları ilə bağlı da qərarlar verilib.
“Kəpəz” – MOİK matçında meydan sahibi dopinq nəzarət otağı hazır olmadığına görə 80 manat cərimələnib.
Problemin səbəbini klubun mətbuat katibi Azad Mustafayevdən soruşduq. Onun "Football-plus.az" saytına açıqlaması belə oldu:
"Bildiyiniz kimi, Gəncə şəhər stadionunda köklü dəyişikliklər gedir. İnzibati binamız da bir neçə ay əvvəl sökülüb və orda yeni akademiya tikilir. Ona görə də stadionda otaqlarla bağlı müəyyən çatışmazlıqlar var. Buna baxmayaraq, biz yenə də oyunun təşkili ilə bağlı müvafiq qaydalara əməl etməyə çalışırıq. Bu dəfə isə dopinq otağının hazırlanması ilə bağlı yubanma olduğuna görə AFFA bizə cərimə yazıb".
Azad bəy, təmir işləri getməsinə baxmayaraq, bundan sonra belə halların baş verməyəcəyini bildirdi:
"Artıq bir oyunumuz qalıb. İndiyə kimi də bizdə hansısa neqativ hadisə olmayıb. İndi də yalnız texniki məsələ ilə bağlı problem yaranıb deyə, cərimə olunduq. Onu da qısa zamanda aradan qaldırdıq. Buna görə AFFA bizi cərimə edibsə, heç nə deyə bilmərik".
Maraqlıdı, bu məsələ ilə klubda kim məşğul olur? "Kəpəz" rəhbərliyi məsul şəxsləri cəzalandıracaq? Mətbuat katibini dinləyək:
"Buna görə klubda çalışanlar məsuldu. Oyuna hazırlıq işləri ilə klubda bir neçə şəxs məşğul olur. Lakin onları günahlandırmaq olmaz. Bu yalnız texniki problemlə bağlıdı. Mən onlarla da danışdım. Əlbəttə, belə hadisələr bizim üçün dərs olur".
ŞAİR ABDULLA
