“Qarabağ” Klublar Komitəsindən ayrılır? - ÖZƏL AÇIQLAMA
İcraiyyə Komitəsinin son iclasından sonra Azərbaycan futbolunun gündəmi dəyişdi.
Qərarlarla tanışsız. Buna ən çox etiraz edən tərəf “Qarabağ” oldu. Ağdam təmsilçisinin baş məşqçisi Qurban Qurbanov Azərbaycan kubokunun yarımfinalının cavab görüşü çərçivəsində “Qəbələ”ni 5:0 hesabı ilə yendikləri qarşılaşmadan sonra keçirilən mətbuat konfransında bildirdi ki, bundan sonra hansısa məsələ ilə bağlı fikir bildirməyəcək, təklif irəli sürməyəcək.
Artıq bu məqam bəzi söz-söhbətlərə səbəb olub. Sosial şəbəkələrdə yer alan məlumata görə, Ağdam təmsilçisi növbəti mövsüm Klublar Komitəsindən imtina etmək haqda düşünür. Məsələni aydınlaşdırmaq üçün klubun meneceri Asif Əsgərovla əlaqə saxladıq. “Qarabağ” rəsmisi Klublar Komitəsinin statusuna və səlahiyyətinə yenidən baxılması üçün təklif irəli sürdüklərini diqqətimizə çatdırdı:
“Klublar Komitəsinin iclasında qərar qəbul olunur. Deyilir ki, bu, belə olsa, daha yaxşı olar. Bunu da daha üst orqanlar klubların ortaq fikri kimi qəbul etməlidi. Bizim fikrimizə hörmətlə yanaşılmalıdı. Söhbət bundan gedir. Klublar hansısa fikrə yekdilliklə müsbət və ya mənfi rəy bildirirsə, daha üst orqan buna əks qərar verirsə, bu zaman Klublar Komitəsi dəyərsizləşir. Bununla da həmin qurumun olub-olmaması sual altına düşür. Məhz bu baxımdan qurumun səlahiyyətinə yenidən baxılmasını təklif etdik. Klublar Komitəsi səs çoxluğu ilə nəyəsə qərar verirsə, hansısa fikri təklif edirsə, yekunda onlara hörmətlə yanaşılmalıdı. Qərar vermək səlahiyyəti yoxdusa, təklifləri dəyərləndirilmirsə, biz klublar olaraq özümüzə hörmət ediriksə, qurumun səlahiyyətini müzakirə etməliyik, məqsəd və məramına yenidən baxılmasını tələb etməliyik”.
İLKİN SULTANLI
Digər xəbərlər
