MBA-da mövsüm sona yaxınlaşdıqca, təbii ki, fərdi mükafatlar da sahibini tapır.

"Football-plus"un məlumatına görə, “Toronto”nun forvardı Skotti Barns cari mövsümün ən yaxşı debütantı sayılıb. O, final səsverməsində “Detroyt”dan Keyd Kanningemi və “Klivlend”dən Evan Moblini qabaqlayıb. “Toronto”nun 2021 draftında 4 nömrə altında seçdiyi Barns debüt mövsümündə orta hesabla 15,3 xal toplayıb, 7,5 ribaund edib və 3,5 məhsuldar ötürmə verib. Fərdi mükafatlar iyunda – final seriyası başa çatandan sonra veriləcək.

Barnsın gələcəkdə Lebron Ceyms səviyyəsinə yüksəlib-yüksəlməyəcəyini demək çətindi. MBA-nın ən parlaq ulduzlarından biri, “Leykers”in forvardı bundan sonra bir daha pley-off mərhələsindən kənarda qalmayacağını vəd edib:

“Mən buna qadirəm və bir daha imkan verməyəcəm ki, komandalarım MBA-nın pley-offunu buraxsın. Bu məqam məni çox ağrıdır”.
[quote][/quote]
37 yaşlı forvard yalnız MBA-da debüt mövsümündə “Klivlend”lə pley-offa adlaya bilməyib, “Leykers”ə keçəndən sonra isə iki dəfə (2019, 2022) belə uğursuzluq yaşayıb.

Bu arada “Şarlott” rəhbərliyi baş məşqçi Ceyms Borreqo ilə vidalaşmağa qərar verib. 44 yaşlı mütəxəssis 2018-ci ildən bu komandanı çalışdırırdı. Onun dövründə qələbə balansı (138-163) 45,8 faiz təşkil edib. “Şarlott” ötən il olduğu kimi, bu il də pley-in mərhələsindən uzağa getməyib.