Van Diyk ''Qalatasaray''ın üzvünü niyə xatırladı?
Dünən İngiltərə kubokunun yarımfinalında ''Liverpul'' ''Mançester Siti''ni 3:2 hesabı ilə məğlub etdi.
''Uembli''də keçirilən oyunun ardından ''Liverpul''un ulduz müdafiəçisi Vircil van Diykdən açıqlama alanlardan biri də Türkiyənin ''Tivibu Spor'' kanalı oldu. 30 yaşlı təcrübəli niderlandlı futbolçu oyun barədə fikirlərini bildirdikdən sonra kanalın əməkdaşı ona ''Türkiyədə də ''Liverpul''un çoxlu sayda pərəstişkarı var. Türkiyə futbolu və ordakı fanatlar barədə nə düşünürsən'' sualını verdi. Van Diykin cavabında ''Qalatasaray''lı Ömər Bayramı xatırlaması diqqət çəkdi: ''Türkiyə çılğın futbolsevərlərə malik bir ölkədi. Onlara qarşı bir neçə dəfə oynamışam. Orda oynayan yaxşı dostlarım var. Məsələn, Ceffri Bruma və ya Ömər Bayramın adını çəkə bilərəm. Onlarla ünsiyyətim davam edir və onları görmək hər zaman xoşdu. Türkiyə möhtəşəm ölkədi. Fürsətdən istifadə edərək ordakı futbolsevərlərə salamlarımı göndərirəm''.
Van Diykin bu sözlərini öz səhifəsində paylaşan Ömərisə ''love bro'' yazaraq ürək işarəsini də qoydu. Van Diykin ''Cim-Bom''lu ilə dostluğu təsadüfi deyil. Ömər Bayram Niderlandda doğulub və Türkiyə ilə yanaşı bu ölkənin də vətəndaşlığına sahibdi. Onlar Van Diyklə eyni yaşdadılar və ikisi də Breda şəhərində eyni məhəllədə böyüyüblər. Ömər 2 il öncə verdiyi müsahibədə Van Diykin uşaq vaxtı tez-tez onların evinə gəldiyini və anasının bişirdiyi yeməklərdən yediyini etiraf etmişdi.
Digər xəbərlər
