Anormallıq: oğul 4-cü hakimdi, ata hakim-inspektor!
Birinci divizionun 21-ci turunda “Zaqatala” doğma meydanda “Qəbələ-2”ni darmadağın etdi - 5:1.
Nəticə ilə yanaşı, daha bir məqam diqqətimizi çəkdi. Oyunun 4-cü hakimi Rəşad Əhmədov idi. Hakim-inspektor funksiyasını isə Rövşən Əhmədov yerinə yetirdi. Maraq üçün qeyd edək ki, adı çəkilən şəxslər birinci dərəcəli qohumdular. Rövşən Əhmədov Rəşad bəyin atasıdı. Azərbaycan çempionatlarında valideynin övladla eyni oyuna təyinat alması bir neçə dəfə baş verib. Məsələn, Əliyar Ağayevin əsas və ya 4-cü hakim olduğu matçda atası Kərim Ağayev AFFA nümayəndəsi funksiyasını yerinə yetirib. Lakin onların bir-birinin işi ilə birbaşa bağlılığı olmayıb. Bu dəfə isə vəziyyət fərqlidi. Hakim-inspektor olan Rövşən Əhmədov oğlu Rəşadın işini qiymətləndirir. Burda nə qədər ədalətli olub-olmaması artıq onun vicdanından asılıdı.
Görəsən, nə üçün belə anormallıq baş verib? Ümumiyyətlə, ata ilə oğulun peşəkarlıq və etika baxımından eyni oyuna təyinat alması nə dərəcədə düzgündü? Bu sualla AFFA Hakimlər Komitəsinin sədri Frits Stuxlikə müraciət etdik. Avstriyalının məsələyə münasibəti belə oldu:
“Bəli, doğru buyurursuz. Onlar ata və oğuldular. Yeri gəlmişkən, belə təyinat ilk dəfə baş vermir. Mən burda qərəzə səbəb olacaq nəsə görmürəm. Onsuz da bütün oyunlar video vasitəsi ilə lentə alınır”.
Gördüyünüz kimi, avstriyalı burda qəribəlik görmür. Amma peşəkarlıq baxımından yanaşanda düz deyil. Axı heç bir ata ən pis övladında da “pis” deməz. Elə dəfələrlə Rəşad Əhmədov premyer-liqa, 1-ci divizion matçlarına təyinat almayanda, Rövşən bəydən bununla bağlı açıqlama almışıq. Həmin vaxtlarda da ata övladında günah görmürdü. İndi sizcə, eyni oyunda valideyn oğlunun ayıbını ört-basdır etməyə çalışmayacaqmı?
İLKİN SULTANLI
Digər xəbərlər
