“Azarkeş problemi yaralı yerimizdi” - “Sumqayıt” rəsmisi
Premyer-liqanın son turunda “Sumqayıt” yenə məğlub oldu.
“Kimyaçılar” bu dəfə doğma meydanda “Qarabağ”a 0:3 hesabı ilə uduzdu. Oyundan əvvəl stadionun ətrafında maraqlı hadisələr yaşandı. Ağdam təmsilçisinin gəlişi “Kapital Bank Arena”nın giriş darvazasında əməlli-başlı izdiham yaratdı. Bunu nəzərə alan asayiş keşişçiləri basırıq düşməsin deyə azarkeşləri 5 nəfərlik qruplarla arenaya buraxırdı. Fanatlar o qədər çox idi ki, “Sumqayıt”ın adı iştirak ərizəsinə düşməyən futbolçuları belə stadiona daxil ola bilmirdi. Nəhayət, klubun mühafizə xidmətinin rəhbəri Elnur İbişovun müdaxiləsindən sonra cəzalı Rəhim Sadıxov, zədəli Yusif Nəbiyev, Elvin Bədəlov içəri keçə bildi. Yeri gəlmişkən, “Sumqayıt”ın müdafiəçisi “Qarabağ”ın üzvü Bədavi Hüseynovla birgə idi.
Maraqlıdı, nə üçün adıçəkilən şəxslər çöldə qalıblar? Onlar “Sumqayıt”ın düşərgəsində olmayıblar? Klub əvvəlcədən arenanın girişində dayanan təhlükəsizlik xidmətinin əməkdaşlarına nə üçün xəbərdarlıq etməyib? Suallarımızı “Sumqayıt”ın mətbuat xidmətinin rəhbəri Rəşad Məmmədov cavabladı: “Açığı, azarkeş problemi yaralı yerimizdi. Özünüz çox gözəl bilirsiz ki, Sumqayıtda futbola maraq hansı səviyyədədi. Klub yaranandan indiyə kimi azarkeşliklə bağlı hansısa problemimiz olmayıb. Rəqib “Qarabağ” olanda onların sayı daha da artır. Bu, klubdan qaynaqlanan məsələ deyil. Stadionumuz 1517 nəfər tutuma malikdi. Buna baxmayaraq, “Qarabağ”la oyunda 2000-ə yaxın adam var idi arenada. Stadion tam dolduğu üçün başqaları içəri keçə bilmədi. Onların çöldə qalması da məntiqlidi. Stadion dolubsa, harda oturacaqlar? Elvin Bədəlov, Rəhim Sadıxov və Yusif Nəbiyevin çöldə qalmasına gəlincə, onlardan ikisi zədəli, digəri isə cəzalı idi. İştirak ərizəsinə salınmayan futbolçular komanda ilə birgə oteldə qalmadıqları üçün arenaya sərbəst şəkildə gəlirlər. Komanda 1 gün öncədən təlim-məşq toplanışına yığışıb, oteldə qalır, başqaları isə evdən gəlir. Onlar da yəqin elə saatda arenaya təşrif buyurublar ki, çöldə qalıblar. Sağ olsun, təhlükəsizlik xidmətinin əməkdaşı Elnur İbişovun səyi nəticəsində futbolçular içəri keçə biliblər. Sözsüz, 15-20 dəqiqə tez gəlsəydilər, daha yaxşı olardı”.
İLKİN SULTANLI
Digər xəbərlər
