Sadəcə, fantastika! “Real”la “Çelsi”nin qarşıdurması, çox güman, nəinki 1/4 finalın, hətta ÇL-in cari mövsümünün bəzəyi olacaq.

Evdə 1:3 hesabıyla uduzan “zadəganlar” səfər oyununda futbolsevərləri həyəcanlandırdı. Londonlular artıq 75-ci dəqiqəyə qədər Maunt, Rüdiger və Vernerin qolları sayəsində 3:0 önə çıxdı. Hələ Alonsonun gözəl qolu da əllə oyun üzündən qeydə alınmadı. Tuxelin komandası oyunboyu dominantlıq etdi və inamla qələbəyə doğru gedirdi. Ancaq Ançelottinin 78-ci dəqiqədə Rodriqonu meydana buraxması oyunun taleyini müəyyənləşdirmək baxımından həlledici oldu. Dəyişiklikdən dərhal sonra Modriç ona ayağının çölü ilə gözəl ötürmə verdi və braziliyalı iki oyunun nəticəsinə görə ümumi hesabı bərabərləşdirdi. Təbii ki, belədə əlavə vaxta ehtiyac yarandı. Maraqlıdı ki, qonaqlar yenə də hücuma can atırdı. Ancaq onların müdafiənin sol cinahında yol verdiyi kobud səhv qol bahasına başa gəldi. Cinah boyunca irəliləyən Vinisius cərimə meydançasına asma etdi, 95 dəqiqə susqunluğu qoruyan Benzema bu dəfə də “Çelsi”ni cəzalandırdı. Onun bu dueldəki 4-cü qolu həlledici oldu. Londonlular daha bir qol vurmaqla penalti seriyasında münasibətləri aydınlaşdırmağa can atsa da, bütün cəhdlər əbəs idi.

Madridlilər inanılmaz xarakter və dözümlülük hesabına yarımfinala adladı. Elə həmin Modriç 120-ci dəqiqədə kreyser sürəti yığmışdı. Və ya zədələnən Benzemanın ağrılar içində komandasını köməksiz qoymamaq istəyi nəyə desən, dəyərdi. Beləliklə, “Real” yarımfinala çıxdı ki, rəqibi də dünən gec saatlarda bəlli oldu. Amma ÇL-in son qalibinin də haqqını vermək lazımdı. ÇL-də “qələbə əzminə görə” mükafatı olsaydı, qeyd-şərtsiz “Çelsi”yə çatmalıydı. Komandaya inanılmaz motivasiya verən Tuxelin və qeyri-adi ruh göstərən “zadəganlar”ın növbəti mərhələdə olmayacağına görə təəssüflənməmək mümkün deyil.

Faktlar
* “Real” son 12 mövsümdə 10-cu dəfə Çempionlar Liqasının yarımfinalında oynayacaq. 2010/11 mövsümündən bəri madridlilər iki dəfə - 2019-cu və 2020-ci illərdə 1/8 finalda mübarizəni dayandırıb. Komanda bu müddətdə həmçinin 4 dəfə kuboku başı üzərinə qaldırıb və 6 dəfə yarımfinalda dayanıb.

* “Real” tarixində 9-cu dəfə Çempionlar Liqasının/Kubokunun qalibini mübarizədən kənarlaşdırdı. İspaniya paytaxtını təmsil edən klub buna qədər 1964 (Milan), 1966 (İnter), 1987 (Portu), 1989 (PSV), 1998 (Dortmund “Borussiya”sı), 2000 (Mançester Yunayted), 2002 (Bavariya) və 2014-cü (Bavariya) illərdə fəalliyyətdə olan çempiona qalib gəlib. “Real” bu mənada ÇL-in rekordçusudu, 2-ci yerdə isə 5 qələbə ilə “Yuventus” qərarlaşıb.

* Ançelotti ÇL tarixinə ardıcıl dörd onillikdə yarımfinala qədər irəliləyən ilk baş məşqçi kimi düşdü. 1999-cu ildə onun “Yuventus”u, 2003, 2005, 2006 və 2007-də “Milan”ı, 2014, 2015 və 2022-də “Real”ı yarımfinalda oynayıb. İtaliyalı mütəxəssis ümumilikdə 8 dəfə yarımfinalda görünüb. Ançelotti “Milan”la iki (2003, 2007), “Real”la bir (2014) dəfə ÇL-i qazanıb. Həmçinin Ançelotti ÇL-də yarımfinala 8-ci dəfə çıxan 3-cü məşqçidi. Ona qədər bu nəticəni yalnız Qvardiola və Mourinyo göstərib.

* Bu dəfə də fərqlənən Benzema ÇL-in cari mövsümünün pley-offunda qol sayını 7-yə çatdırdı. Turnirin bir mövsümün pley-offunda qol sayına görə rekordçusu 2017-də “Real”ın heyətində 10 qol vuran Kriştiano Ronaldodu. Bu göstəricidə 2-ci yeri 8 qolla Messi tutur. Benzema kimi Neymar da ÇL-in pley-offunda bir mövsümdə 7 qol vurub.

* “Çelsi” İngiltərənin avrokuboklarda səfərdə “Real”ın qapısına üç qol vuran 2-ci klubudu. 1968-ci ilin mayında “Mançester Yunayted” Çempionlar Kubokunun yarımfinal mərhələsinin cavab oyununda Madriddən 3:3 hesablı heç-heçə ilə ayrılıb.

ORXAN