Premyer liqanın 21-ci turunun “Qəbələ” – “Keşlə” (1:1) oyunu gözləniləndən də gərgin keçdi.

Hətta meydandakı aqressivlik ehtiyat oyunçular skamyasına da sirayət etdi. Belə ki, 64-cü dəqiqədə qonaqların futbolçusu Kamal Bayramov qeyri-idman hərəkətinə görə 2-ci sarı vərəqə ilə meydandan kənarlaşdırıldı. Qolkiper meydandan çıxarkən hakimlər briqadasını təhqir etdi. Dünən isə İntizam Komitəsi onu 3-ü şərti olmaqla 4 oyun cəzalandırdı, klubu 3200 manat cərimələdi.

Bununla bağlı Kamalın fikrini öyrəndik:

“Oyunla bağılı çox danışmaq istəmirəm. Ancaq ilk hissədə üstün tərəf biz idik. Verilən tapşırıqları düzgün yerinə yetirirdik. İkinci hissədə isə boşluqlar yarandı. Komanda yoldaşım qımızı vərəqə aldığından üstünlük bir qədər “Qəbələyə” keçdi. Lakin ümumi dəyərləndirsək, pis deyildik. İkinci yarıda çox yaxşı müdafiə olunduq, əks-hücumlar qurduq. Bir sözlə, oyunun axarına uyğun hərəkət etdik...

Etirazımın səbəbi rəqibin cərimə meydançası daxilindəki hərəkəti idi. “Qəbələ”nin müdafiəçisi hakimin fitindən öncə topu əli ilə saxladı. Bunun birmənalı şəkildə 11 metrlik cərimə zərbəsi olduğunu bildirdim. Lakin referi bunu qəbul etmədi. Sərt reaksiya verdim. Cəzam açıqlandı və onu çəkəcəm. Belə halın bir də təkrarlanmamasına çalışacam”

Bayramov “Şamaxı” adı ilə ilk oyunda ola bilməyəcəyi üçün kədərlənir:

“Yeni adla yeni stadiondakı ilk matçımızda ola bilməyəcəyim üçün çox məyusam. Ancaq əminəm ki, komanda yoldaşlarım Şamaxı azarkeşlərini sevindirmək üçün əllərindən gələni edəcək. Bizi dəstəkləmələri üçün onları tribunaya dəvət edirəm. Hər şey çox gözəl olacaq. Şamaxı böyük futbol üçün darıxıb. Biz də Şamaxı üçün”.

SƏNƏM FƏRHADOVA