Velebit Sloveniya toplanışını dəyərləndirdi - AÇIQLAMA
19 yaşadək futbolçulardan ibarət yığma təlim-məşq toplanışını başa vurub.
Hazırlığın ilk mərhələsini Bakıda, ikinci hissəsini Sloveniyada keçirən yığma iki yoldaşlıq oyununa çıxıb. Hər iki matçı da adı çəkilən ölkədən olan həmyaşıdlarına qarşı keçirib. U-19 rəqibinə uyğun olaraq, 0:1 və 1:2 hesabı ilə uduzub.
Görəsən, ardıcıl məğlubiyyətlərin səbəbi nədi? Komandada qalib gəlmək üçün nə çatışmır? Futbolçular niyə ümidləri doğrultmur? Bu suallara cavab tapmaq üçün U-19-un baş məşqçisi Miloş Velebitlə danışdıq. Mütəxəssis öncə toplanış haqda ümumi fikirlərini bildirdi:
“Üç gün Bakıda toplanış keçdik. Burda 4 məşq etdik. Toplanış zamanı bəzi problemlərlə üzləşdik. Zədəli oyunçularımız var idi. Bir neçə futbolçu Rusiyadan gələ bilməmişdi. Bu səbəbdən əsas heyətin 4-5 oyunçusunu itirdik. Nəticədə Bakıda Sloveniya ilə oyunlar üçün taktiki və fiziki məşqlər keçə bilmədik. Düzdü, rəqib haqda yetərincə məlumatımız var idi. Onların ötən aylarda bir neçə matçını izləmişdik. Burda yaxşı nəticələr əldə etmişdilər. Serbiyalı həmyaşıdları və Slovakiyanın əsas komandası ilə qarşılaşmışdılar. Bir oyunda uduzub, digərini udmuşdular. Güclü rəqib olduqlarını nəzərə alaraq qarşılaşmalara hazırlaşmışdıq”.
Velebitin məğlubiyyətlərə izahı belə oldu:
“Burda iki bərabərsəviyyəli oyunlar keçirdik. İlk matçda 0:1 hesabıyla məğlub olduq. Hər iki hissədə bərabər, yaxşı mübarizə apardıq. Lakin sonda referi səhvə yol verdi. Rəqibin lehinə penalti təyin etdi. 90-cı dəqiqədə Sloveniya bundan yararlanaraq qələbə qazandı. Bu həqiqətən də hakimin səhvi idi. Hətta Sloveniyanın baş məşqçisi də bunu etiraf etdi. Amma problem yoxdu. Biz mübarizədə uduzmadıq. Uduzduğumuza görə də məyus olmadıq. Futbolçularım güclü rəqiblə başabaş mübarizə apardı. İkinci matçda da komandamdan razı qaldım. Son dəqiqələrə kimi hesab 1:1 idi. Lakin yekunda müdafiəmizdəki bir səhvə görə qol buraxdıq. Məğlubiyyətlərə görə üzgünəm. Amma hər iki matçda ciddi rəqibə qarşı mübarizə apardıq. Əlbəttə, fiziki durumumuzda, futbolçuların hazırlıq səviyyəsində yetərincə problem var. İstədiyim gücdə deyilik. Amma oyunçular hər iki görüşdə həm texniki, həm də taktiki baxımdan möhtəşəm idi. Bununla kifayətlənməyəcəyik. Hər iki görüşdə üzləşdiyimiz problemləri həll etməyə çalışacağıq. Sadəcə, futbolçuların fiziki cəhətdən zəif olması məni üzdü. Hazırlıq görüşlərində rəqibə yalnız bu baxımdan məğlub olduq. Fiziki göstəricilərimizi artırmalıyıq ki, növbəti dəfə belə güclü komandalarla matçlarda qələbə qazana bilək”.
SƏNƏM FƏRHADOVA
Digər xəbərlər
