Məlum olduğu kimi İngiltərə futbolunda premyer-liqaya vəsiqə qazanan son klubun adı mayın 23-də bəlli olmalıdı.

Həmin gün ''Uembli''də baş tutacaq pley-offun finalında ''Sauthempton'' ilə ''Hall Siti'' qarşılaşmalıdı. Ancaq həmin oyunun keçirilməsi ciddi sual altına düşüb. Türkiyəli iş adamı Acun Ilıcalının sahibi olduğu ''Hall Siti'' final oyununu keçirmədən premyer-liqaya yüksələ bilər.

Məsələ burasındadı ki, ''Sauthempton''un yarımfinalda mübarizədən kənarlaşdırdığı ''Midlsbro'' bu klubdan şikayət edib. ''Midlsbro'' iddia edir ki, evdə keçirdiyi yarımfinalın ilk oyunundan öncə bir nəfər məşqin görüntülərini gizlicə çəkirmiş. Guya həmin ''cəsus'' ''Sauthempton''un məşqçilər korpusunda yer alan analizçilərdən biridi. Klub buna dair əlində sübutlar olduğunu açıqlayıb. İddialara inansaq, ''Midlsbro''nun ''Roklayf Park'' məşq bazasında bir nəfər ağacın arxasında gizlənərək mobil telefonunu havaya qaldırıbmış.

İngiltərə futbolunda rəqib komandanın məşqini gizli izləmək və ya məşqdən görüntü əldə etməyə çalışmaq qanun pozuntusu sayılır. İngiltərə Futbol Liqası (İFL) məsələ ilə araşdırma başlandığını rəsmən açıqlayıb. Bu araşdırmanın nəticəsi ictimaiyyətə mayın 19-da açıqlanacaq. Bununla bağlı hətta müstəqil intizam komissiyası yaradılıb. Qərarı da həmin komissiya verəcək.

İFL-dən bildirilib ki, pley-offun finalı ilə bağlı təqvimdə dəyişiklik baş verə bilər. Başqa sözlə desək, oyunun keçirilməmə ehtimalı var. Qurum hətta təqvimə təsir göstərməməsi üçün ''Sauthempton''un qərara mümkün etirazı zamanı atacağı addımı da müəyyənləşdirib.

Maraqlıdı ki, ''Sauthempton''un rəsmi səhifəsində final matçının biletlərinin satışa çıxarılması ilə bağlı yerləşdirilən xəbər bir müddət sonra silinib!