La Liqanın 35-ci turu ''El Klasiko''ya səhnə oldu.

"Football-plus.az" xəbər verir ki, çempionluq üçün son addımı atmaq üzrə olan ''Barselona'' doğma ''Nou Kamp''da ''Real''ı qəbul etdi. Oyun meydan sahibləri üçün uğurlu alındı. Markus Reşford artıq 9-cu dəqiqədə cərimə zərbəsini mükəmməl yerinə yetirərək qələbənin əsasını qoydu. İngiltərəli ulduzdan öncə ''El Klasiko''da cərimə zərbəsindən qol vuran sonuncu ''Barsa''lı futbolçu 2012--nin oktyabrında Lionel Messi olmuşdu. 18-ci dəqiqədə gözəl təşkil olunmuş hücum zamanı Dani Olmonun ötürməsindən sonra Ferran Torres fərqi artırdı. Qarşılaşmada başqa qol olmadı. Son matçlarda olduğu kimi yenə zəif təsir bağışlayan Madrid nəhənginin 63-cü dəqiqədə Cud Bellingem ilə vurduğu qol ofsayd üzündən qeydə alınmadı. ''Real'' 77 xalda qaldı. ''Barsa'' isə xalını 91-ə yüksəldərək sona 3 tur qalmış ardıcıl 2-ci, tarixinin 29-cu çempionluğunu qazandı.

Kataloniya nəhəngi tarixində ilk dəfə çempionluğu məhz ''El Klasiko''da rəsmiləşdirdi. Bu mövsüm ''Barsa''nın evdə keçirdiyi 18 La Liqa matçının hamısında qələbə qazanması diqqət çəkir. Bu, turnirin tarixində yeni rekorddu. Komanda son ev oyununda ''Betis''i də yensə, mövsümü evdə xal itirmədən tamamlayaraq daha bir ilkə imza atacaq. İndi ''Barsa''nın sonuncu hədəfi qalan 3 turda da maksimum nəticə qazanaraq mövsümü 100 xalla tamamlamaqdı.