Misli premyer-liqası
3-cü dövrə, 31-ci tur
8 may
İmişli – Zirə 0:0
“İmişli”nin bu rəqiblə ev oyununun balansı: 1:+0=1-0, 1:1.
2025/26 – 1:1.
Cəzalı: yoxdu.
“Futbol+”in proqnozu: 20-30-50.
Hakimlər: KAMRANBƏY RƏHİMOV, Kamran Bayramov, Mirnihat Seyidov, Emin Əliyev.
VAR hakimi: Rauf Cabbarov.
VAR hakiminin köməkçisi: Cəmil Quliyev.
Hakim-inspektor: Orxan Məmmədov .
AFFA nümayəndəsi: Nəriman Axundov.
Quba, Olimpiya İdman Kompleksinin stadionu. Saat 16.30.

Mövsümün əvvəlindən bəri iddialı rəqiblərinə də başağrısı olan, debütant olmasına baxmayaraq, qənaətbəxş nəticələr qazanan “İmişli” “Aran-Naxçıvan”ı yenməklə rəsmən premyer-liqada qaldı. Düzdü, bu səbəbdən “pələnglər”in meydana motivasiyasız çıxacağını düşünənlər var. Lakin buna bel bağlamaq mümkünsüzdü. Top yumru, meydan düzdüsə, Rəşad Sadıqovun “Neftçi” ilə 4-cü sıra uğrunda mübarizə aparan “Zirə”si əsla arxayınlaşmamalıdı. Çünki xal itkisi “qartallar”ın premyer-liqa yoluyla avrokuboklara yollanmaq şansını minimum həddə endirəcək. Özü də qəsəbə təmsilçisi hələ bu rəqibin öhdəsindən gələ bilməyib.

Ümumiyyətlə, bu komandalar indiyə qədər iki dəfə qarşılaşıb. Hər iki matçda “sülh” qeydə alınıb. Təbii ki, topların nisbətində bərabərlik var – 1:1.

Sabah – Kəpəz
“Sabah”ın bu rəqiblə ev oyunlarının balansı: 7:+4=2-1, 15:7.
2022/23 – 5:0, 2:0; 2023/24 – 2:2, 3:2; 2024/25 – 2:2, 0:1; 2025/26 – 1:0.
Cəzalılar: İvan Lepinitsa, Aleksey İsayev, Rəhman Daşdəmirov (hamısı “Sabah”), Luis Paçu (Kəpəz).
“Futbol+”in proqnozu: 50-30-20.
Hakimlər: ELVİN BAYRAMOV, Elşad Abdullayev, Pərvin Talıbov, Kamran Əliyev.
VAR hakimi: Fərid Hacıyev.
VAR hakiminin köməkçisi: Teymur Teymurov.
Hakim-inspektor: Rəhim Həsənov.
AFFA nümayəndəsi: Kifayət Mustafayeva.
Bakı, “Bank Respublika Arena”. Saat 19.30.

Sona 4 tur qalmış çempion olan “Sabah”ın motviyasiya ilə bağlı problemi yoxdu. Komanda bunu Şamaxıda qazandığı böyükhesablı qələbəylə ortaya qoydu. Hər halda, qarşıdan “Zirə” ilə kubokun final oyunu gəlir. İndi fiziki, psixoloji yorğunluğa təslim olmağın vaxtı deyil. “Bayquşlar” həm də 8 aydan çoxdu davam edən qələbə seriyasını qorumalıdı. Zarafat deyil, Masazır təmsilçisi bütün turnirlər daxil olmaqla son 33 oyunda uduzmayıb. “Kəpəz” isə 10-cu sırada möhkəmlənmək uğrunda döyüşəcək. Axı “Qəbələ”dən cəmi 4 xal öndə olan gəncəlilər çempiona qalib gəlsə, “qırmızı-qaralar” uduzsa, “sarı-göylər” rəsmən premyer-liqada qalacaq. O başqa məsələ ki, hər iki komandanın rəqibi ölkənin ən güclüləridi.

Bu komandalar indiyə qədər 14 dəfə qarşılaşıb. Bu oyunların 9-da “Sabah”, 2-də “Kəpəz” qalib gəlib, 3-də “sülh” qeydə alınıb. Topların nisbətində “bayquşlar” öndədi – 32:16.

9 may
Qəbələ – Qarabağ
“Qəbələ”nin bu rəqiblə ev oyunlarının balansı: 31:+7=7-17, 28:47.
2006/07 – 0:2; 2007/08 – 1:2; 2008/09 – 1:2; 2009/10 – 1:1, 3:1; 2010/11 – 2:1: 2010/11 – 0:0; 2011/12 – 1:0; 2012/13 – 1:1, 0:2; 2013/14 – 0:1, 0:1; 2014/15 – 2:1, 1:1; 2015/16 – 2:2, 1:2; 2016/17 – 2:0, 2:0; 2017/18 – 1:0, 0:1; 2018/19 – 1:3, 1:2; 2019/20 – 1:1; 2020/21 – 1:1, 0:5; 2021/22 – 0:2; 2022/23 – 0:1, 1:3; 2023/24 – 1:2, 0:4; 2025/26 – 1:2.
Cəzalı: yoxdu.
“Futbol+”in proqnozu: 20-30-50.
Hakimlər: İNQİLAB MƏMMƏDOV, Rahil Ramazanov, Orxan İbişov, İslam Məmmədov.
VAR hakimi: Əli Əliyev.
VAR hakiminin köməkçisi: Kamran Bayramov.
Hakim-inspektor: Ceyhun Haşımov.
AFFA nümayəndəsi: Elman Musayev.
Qəbələ, şəhər stadionu. Saat 17.00.

“Qəbələ” heç cür toparlana bilmir. “Qırmızı-qaralar” baxımlı oyunla göz oxşasa da, qələbə qazanmaqda çətinlik çəkir. Ümumiyyətlə, əyalət təmsilçisi son 12 matçın yalnız birində 3 xala yiyələnə bilib. Odu ki, 11-ci yer kollektivin daimi məskəninə çevrilir. Yenə də burdan xilas olmaq üçün cüzi şanslar var. Daha dəqiqi, komanda “Qarabağ”ı devirməli, xal ehtiyatını mütləq artırmalıdı. Yoxsa özünü 1-ci liqanı 2-ci sırada bitərəcək komandaya qarşı pley-off matçının biraddımlığında tapacaq. “Qarabağ” isə meydana 2-ci pillədəki yerini möhkəmlətmək üçün çıxacaq. Təbii ki, favorit qonaqlardı və ötən həftə yerinə göz dikən “Turan Tovuz”u məğlub edən “köhlən atlar” bu dəfə də inamlı görünəcək.

Bu komandalar indiyə qədər 64 dəfə qarşılaşıb. Həmin oyunların 10-da “Qəbələ”, 38-də “Qarabağ” qələbə qazanıb, 16-da qalib müəyyənləşməyib. Topların nisbətində “köhlən atlar” öndədi – 108:48.

Sumqayıt – Araz-Naxçıvan
“Sumqayıt”ın bu rəqiblə ev oyunlarının balansı: 5:+3=1-1, 6:3.
2023/24 – 2:0, 1:0; 2024/25 – 0:1, 0:0; 2025/26 – 3:2.
Cəzalı: yoxdu.
“Futbol+”in proqnozu: 30-30-40.
Hakimlər: RƏVAN HƏMZƏZADƏ, Şirmamed Mameddov, Tərlan Talıbzadə, Cavid Cəlilov.
VAR hakimi: Kamal Umudlu.
VAR hakiminin köməkçisi: Vüsal Məmmədov.
Hakim-inspektor: Anar Salmanov.
AFFA nümayəndəsi: Namiq Əliyev.
Sumqayıt, Mehdi Hüseynzadə adına şəhər stadionu. Saat 19.30.

Söhbət mövsümün əvvəlində sinəsinə döyərək avrokuboklar uğrunda mübarizə aparacaqlarını bildirən komandaların duelindən gedir. Artıq həm “Sumqayıt”, həm də “Araz-Naxçıvan” bu yarışdan çəkilib. Daha doğrusu, şanslar tükənib. Bu səbəbdən matçın baxımlı keçib-keçməyəcəyi sual altındadı. Hər halda, komanda ruhu olmalı, əzmkarlıq sərgilənməlidi ki, azarkeşlərin qarşısında boynubükük olmasınlar.

Komandalar indiyə qədər 11 dəfə qarşılaşıb. Bunların 4-də “Sumqayıt”, 4-də “Araz-Naxçıvan” qalib gəlib, 3-də hərəyə 1 xal düşüb. Topların nisbətində “qırmızı-ağlar” öndədi – 8:10.

10 may
Turan Tovuz – Karvan Yevlax
“Turan Tovuz”un bu rəqiblə ev oyununun balansı: 1:+1=0-0, 1:0.
2025/26 – 1:0.
Cəzalı: yoxdu.
“Futbol+”in proqnozu: 40-30-30.
Hakimlər: ƏKBƏR ƏHMƏDOV, Akif Əmirəli, Zeynal Zeynalov, Niyaz Əhmədov.
VAR hakimi: Elçin Məsiyev.
VAR hakiminin köməkçisi: Namiq Hüseynov.
Hakim-inspektor: Əmrah İbrahimov.
AFFA nümayəndəsi: Eldəniz Musayev.
Tovuz, şəhər stadionu. Saat 17.00.

“Turan Tovuz”un mövsümü 3-cü yerdə başa vuracağı böyük ölçüdə dəqiqləşib. Məhz bu matç uğurun rəsmiləşməsiylə, daha doğrusu, “bozqurd”un 32 ildən sonra avrokuboklara vəsiqə qazanmasıyla nəticələnə bilər. Təbii ki, bunun üçün əvvəlcə qələbə qazanmaq lazımdı ki, meydan sahibləri qarşılaşmanın aşkar favoritidi. Ancaq “Karvan-Yevlax”ın mövcud durumunu da gözardı edə bilmərik. Qonaqlar çətin səfər matçında, minlərlə rəqib azarkeşinin təzyiqi altında elitada qalmaq ümidini yaşatmağa çalışacaq. O başqa məsələ ki, komandanın mümkün xal itkisi elitanı tərk etməsiylə nəticələnəcək!

Komandalar indiyə qədər 2 dəfə üz-üzə gəlib. Hər iki matç “bozqurd”un qələbəsiylə nəticələnib. Tovuzlular topların nisbətində də öndədi – 3:1.

Neftçi – Şamaxı
“Neftçi”nin bu rəqiblə ev oyunlarının balansı: 40:+24=12-4, 75:35.
1999/00 – 5:1; 2000/01 – 7:2; 2001/02 – 0:0; 2003/04 – 2:1; 2004/05 – 1:1; 2005/06 – 1:1; 2006/07 – 0:1; 2007/08 – 2:0; 2008/09 – 1:3; 2009/10 – 2:1, 1:0; 2010/11 – 1:1, 0:0; 2011/12 – 0:1, 2:1; 2012/13 – 2:0, 2:0; 2013/14 – 3:1, 2:2; 2014/15 – 0:0, 0:2; 2015/16 - 1:1, 4:2; 2016/17 – 2:1, 2:1; 2017/18 – 3:1, 3:2; 2018/19 – 2:0, 2:0; 2019/20 – 0:0, 3:1; 2020/21 – 2:1, 3:1; 2021/22 – 3:0, 3:1; 2022/23 – 3:0, 3:1; 2024/25 – 2:2, 1:0; 2025/26 – 1:1.
Cəzalı: Brahim Konate (Neftçi).
“Futbol+”in proqnozu: 50-30-20.
Hakimlər: TURAL QURBANOV, Cəmil Quliyev, Asiman Əzizli, Rövşən Rəcəbov.
VAR hakimi: Rəşad Əhmədov.
VAR hakiminin köməkçisi: Müslüm Əliyev.
Hakim-inspektor: Asim Xudiyev.
AFFA nümayəndəsi: Seymur Səlimli.
Bakı, “Palms Sports Arena”. Saat 19.30.

Heç şübhəsiz, “Neftçi” meydana 4-cü sıradakı yerini qorumaq üçün çıxacaq. Düzdü, o vaxta kimi “Zirə”nin matçının nəticəsi bəlli olacaq. Ancaq həmin oyunun bu qarşılaşmaya hansısa təsirindən söhbət gedə bilməz. Azı ona görə ki, qarşıda hələ daha iki tur var. Bu səbəbdən “ağ-qaralar” yalnız qələbəyə köklənməlidi. Amma paytaxt təmsilçisi cari mövsümdə “şirlər”i məğlub edə bilməyib. “Şamaxı”nın “Sabah”la oyunda böyükhesablı məğlubiyyət yaşaması, premyer-liqada növbəti mövsüm də çıxış edəcəyinin rəsmiləşməsi kimi məqamlar oyunun axarına təsir göstərə bilər. Hər halda, meydan sahibləri bütün fürsətlərdən yararlanmalıdı.

Komandalar indiyə qədər 80 dəfə qarşılaşıb. Bunların 44-də Bakı, 16-da Şamaxı təmsilçisi qələbə qazanıb, 20-də qalib müəyyənləşməyib. Topların nisbətində “ağ-qaralar” öndədi – 127:74.

KƏNAN BAHADIR