Misli premyer-liqası
2-ci dövrə, 29-cu tur
25 aprel
İmişli – Sumqayıt 0:2
Aleksandr Ramalinqom, 34; 85
“İmişli”nin bu rəqiblə ev oyununun balansı: 1:+0=0-1, 0:0.
2025/26 - -:+*
* - texniki nəticə top fərqində nəzərə alınmayıb.
Cəzalı: yoxdu.
“Futbol+”in proqnozu: 30-30-40.
Quba, Olimpiya İdman Kompleksinin stadionu. Saat 16.00.

Qəbələ – Araz-Naxçıvan
“Qəbələ”nin bu rəqiblə ev oyunlarının balansı: 3:+2=0-1, 5:5.
2023/24 – 1:4, 2:0; 2025/26 – 2:1.
Cəzalı: Adriel Ba Loua (Qəbələ).
“Futbol+”in proqnozu: 30-30-40.
Qəbələ, şəhər stadionu. Saat 18.30.

Heç şübhəsiz, “Qəbələ” üçün həyəcan təbili çalmağın vaxtı çatıb. 11-ci pillənin daimi sakininə çevrilən “qırmızı-qaralar” ilk növbədə “Karvan-Yevlax”ın yüksəlişdə olduğunu nəzərə almalı, xal ehtiyatını artırmaq üçün dəridən-qabıqdan çıxmalıdı. Axı futbol həm də pis sürprizlərlə doludu. O başqa məsələ ki, qarşıda avrokuboklardan əlini üzmək istəməyən “Araz-Naxçıvan” var. “Qırmızı-ağlar” yarışdan qopmamaq üçün bütün gücünü Qəbələdə sərf etsə, təəccüblənməyəcəyik.

Bu komandalar indiyə qədər 6 dəfə qarşılaşıb. Bunların 2-də qəbələlilər, 3-də naxçıvanlılar qələbə qazanıb, 1-də qalib müəyyənləşməyib. Topların nisbətində “qırmızı-ağlar” öndədi – 10:7.

26 aprel
Şamaxı – Kəpəz
“Şamaxı”nın bu rəqiblə ev oyunlarının balansı: 20:+13=4-3, 43:17.
1999/00 – 3:1; 2000/01 – 3:0; 2001/02 – 2:0; 2003/04 – 8:0; 2004/05 – 2:0; 2005/06 – 5:0; 2010/11 – 1:0; 2011/12 – 0:0; 2012/13 – 3:1; 2015/16 – 1:0, 1:0; 2016/17 – 2:2, 4:1; 2017/18 – 3:2, 0:2; 2022/23 – 1:1, 1:1; 2024/25 – 0:1, 2:1; 2025/26 – 1:4.
Cəzalı: Mahamadu Ba (Kəpəz).
“Futbol+”in proqnozu: 40-30-30.
Şamaxı, şəhər stadionu. Saat 16.00.

Bir tərəfdə premyer-liqadakı yerini qoruyub-saxladığı böyük ölçüdə dəqiqləşən “şirlər”, o biri tərəfdə sabit nəticələr qazanmaqda çətinlik çəkən, “Qarabağ”a qalib gələndən sonra keçirdiyi son üç matçda uduzan “sarı-göylər”… İş ondadı ki, hazırda “Şamaxı” da “qara zolaqdadı”. Ayxan Abbasovun komandası son 4 matçda qələbə qazana bilməməklə daha yuxarı sıralarda olmaq fürsətini əldən verib. Düzü, məhz qeyd olunan səbəblərə görə favoriti müəyyənləşdirmək çətin olsa da, xalların gəncəlilərə daha çox lazım olduğunu bilirik. Bu səbəbdən Şamaxıda baxımlı matç izləyəcəyimizi proqnozlaşdırmaq mümkündü.

Bu komandalar indiyə qədər 40 dəfə üz-üzə gəlib. Bunların 20-də “şirlər”, 10-da “sarı-göylər” qalib gəlib, 10-da “sülh” qeydə alınıb. Topların nisbətində “Şamaxı” irəlidədi – 65:42.

Neftçi – Qarabağ
“Neftçi”nin bu rəqiblə ev oyunlarının balansı: 49:+12=16-31, 44:66.
1992/93 – 1:1; 1993/94 – 1:1; 1994/95 – 3:2; 1995/96 – 2:2, 2:2**; 1996/97 – 0:0; 1997/98 – 1:1; 1998/99 – 0:0, 0:0; 1999/20 – 2:0; 2000/01 - +:-*; 2001/02 – 1:0; 2003/04 – 2:0; 2004/05 – 1:0; 2005/06 – 2:0; 2006/07 – 0:0; 2007/08 – 0:0; 2008/09 – 0:1; 2009/10 – 0:0, 0:0; 2010/11 – 1:1, 2:0; 2011/12 – 3:2, 2:1; 2012/13 – 0:1, 1:2; 2013/14 – 0:0, 1:4; 2014/15 – 1:3, 0:1; 2015/16 – 1:0, 1:2; 2016/17 – 0:2, 1:2; 2017/18 – 1:3, 0:0; 2018/19 – 3:1, 2:3; 2019/20 – 0:0; 2020/21 – 0:6, 1:0; 2021/22 – 1:2, 1:2; 2022/23 – 0:4, 2:4; 2023/24 – 0:2, 1:4; 2024/25 – 0:3, 0:1.
* - texniki nəticə top fərqində nəzərə alınmayıb.
** - neytral meydanda keçirilib.
Cəzalı: Breno Almeyda (Neftçi).
“Futbol+”in proqnozu: 30-30-40.
Bakı, “Palms Sports Arena”. Saat 19.00.

Nəhayət, Azərbaycan derbisi ilə bağlı həsrət başa çatır! İki gün sonra əzəli rəqiblərin dişə-diş, qana-qan prinsipinin əsas tutulacağı görüşü olacaq. Təbii ki, avrokuboklara vəsiqə qazanmaq üçün döyüşən “Neftçi” meydanı qələbəylə tərk etməyə cəhd göstərəcək. “Turan Tovuz”un nəfəsini kürəyində hiss edən “Qarabağ” da xal itirməməlidi. Öz aramızdı, belədə qısa zamanda 2-ci yer də əldən çıxa bilər. Əlbəttə, ağdamlılar bunu qətiyyən arzulamır, lakin bakılıların da ardıcıl üçüncü mövsümdə avrokuboklardan kənarda qalmaq niyyəti yoxdu. Göründüyü kimi, bütün məqamlar derbinin həddən artıq gərgin, maraqlı və güzəştsiz keçəcəyinə işarə edir.

Komandalar indiyə qədər 100 dəfə qarşılaşıb. Bunların 23-də “Neftçi”, 46-da “Qarabağ” qələbə qazanıb, 31-də hərəyə bir xal düşüb. Topların nisbətində “köhlən atlar” öndədi – 142:84.

27 aprel
Turan Tovuz – Zirə
“Turan Tovuz”un bu rəqiblə ev oyunlarının balansı: 7:+3=0-4, 6:9.
2022/23 – 1:3, 0:2; 2023/24 – 1:0, 1:2; 2024/25 – 1:0, 0:2; 2025/26 – 2:0.
Cəzalılar: Emmanuel Hakman, Joarlem Batista (hər ikisi “Turan Tovuz”).
“Futbol+”in proqnozu: 40-30-30.
Tovuz, şəhər stadionu. Saat 18.00.

Bazar ertəsi keçiriləcək oyun hər iki tərəf üçün taleyüklü olacaq. Çünki həm “Turan Tovuz”, həm də “Zirə” mövqeyini möhkəmlətmək uğrunda tər tökəcək. Düzü, indiki şəraitdə komandaların xal itirmək lüksü yoxdu. Axı “bozqurd” həm kubokda yaşananların qisasını almalı, həm də “Qarabağ”ı qabaqlamaq haqda düşünməlidi. “Qartallar” isə “Neftçi”nin onlara çatmasına imkan verə bilməz. Deməli, Tovuzda minlərlə azarkeşin şahidliyi ilə gərgin duel izləyəcəyik. Hələ onu demirik ki, tovuzlu azarkeşlərlə “Zirə”nin baş məşqçisi Rəşad Sadıqovun münasibətləri qaydasında deyil…

Bu komandalar indiyə qədər 14 dəfə üz-üzə gəlib. Bunların 4-də “bozqurd”, 7-də “qartallar” qələbə qazanıb, 3-də qalib müəyyənləşməyib. Topların nisbətində qəsəbə təmsilçisi öndədi – 16:12.

Sabah – Karvan-Yevlax
“Sabah”ın bu rəqiblə ev oyununun balansı: 1:+1=0-0, 4:1.
2025/26 – 4:1.
Cəzalılar: Abdulla Xaybullayev, Stiv Solvet (hər ikisi “Sabah”), Eltun Turabov (Karvan-Yevlax).
“Futbol+”in proqnozu: 50-30-20.
Bakı, “Bank Respublika Arena”. Saat 20.00.

Tura liderin autsayderi qəbul edəcəyi görüşlə yekun vurulacaq. Təbii ki, favorit Masazır təmsilçisidi. Lakin qonaqların son iki matçda qələbə qazandığını unutmamalıyıq. Bu o deməkdi ki, yevlaxlılar səfərə xoş əhval-ruhiyyə ilə çıxacaq. “Bayquşlar” pis sürprizlə qarşılaşmaq istəmirsə, ehtiyatı əldən verməməlidi. Axı Fizuli Məmmədovun komandasının itirəcəyi nəsə yoxdu!

Bu komandalar indiyə qədər 2 dəfə qarşılaşıb. Hər iki oyun “Sabah”ın qələbəsiylə başa çatıb. Top fərqi belədi – 6:1.

1. Sabah 28 21 6 1 67-21 69
2. Qarabağ 27 17 5 5 55-19 56
3. Turan Tovuz 28 16 7 5 38-19 55
4. Zirə 28 11 12 5 37-31 45
5. Neftçi 27 11 11 5 45-25 44
6. Araz-Naxçıvan 28 11 6 11 37-52 39
7. Sumqayıt 29 11 5 13 38-40 38
8. Şamaxı 28 7 11 10 25-29 32
9. İmişli 29 6 11 12 21-39 29
10. Kəpəz 28 6 3 19 22-55 21
11. Qəbələ 28 5 4 19 25-44 19
12. Karvan-Yevlax 28 3 5 20 21-57 14

Bombardir: Coy-Lens Mikels (Sabah) – 18.

Bu komandaların duelləriylə bağlı maraqlı məqamlar
// “Sumqayıt” xal itirməyib. “İmişli” qol vurmayıb.
// “Qəbələ” son 5 oyunda qol vurub. “Araz-Naxçıvan” bütün səfərlərdə qol buraxıb.
// Son 4 matçda ən azı 2 qol qeydə alınıb. “Kəpəz” son 9 səfər oyununda qol vurub.
// “Neftçi” son 6 oyunda qol vurmayıb. “Qarabağ” ardıcıl 10 qələbə qazanıb.
// Son 6 görüşdə ikidən çox qol olmayıb. “Turan Tovuz”un son üç ev oyununda yalnız bir komanda qol sevinci yaşayıb.
// “Sabah” xal itirməyib. Masazır təmsilçisinin ev oyununda hər iki komanda qol vurub.

KƏNAN BAHADIR